Масовен руски напад со ракети и со дронови го погоди Киев и неговата околина шести ден по ред. Четири лица загинаа, а најмалку 14 се повредени. Меѓу повредените има и деца.
Три лица загинаа во самиот Киев, соопштија градските власти. Уште 5 лица се повредени.
Остатоци од соборени руски дронови предизвикаа пожари во Дарничкиот, Соломјанскиот и во Холосијевскиот реон.
Уште едно лице загина во Бориспиљ, источно од Киев. Таму беше оштетена деловна зграда, а едно лице беше повредено.
Осум лица се повредени при удар во станбена зграда.
„Киевскиот регион беше цел на масовен напад од руски ракети и беспилотни летала синоќа“, објави началникот на Регионалната воена администрација на Киев, Тимур Ткаченко, на Телеграм.
Нападот се случи токму кога учениците требаше да се вратат во училиштата по летниот распуст.
„Со голема брзина се движи кон Киев“
„Киев пост“ објави дека доцна синоќа и рано утрово одекнале десетина силни експлозии. На небото биле забележани и блесоци.
Украинските воздухопловни сили претходно предупредија дека кон Киев се движат балистички ракети. Прво регистрирале „мета што со голема брзина се движи кон Киев“.
Потоа предупредиле за повеќе цели кои се приближувале кон главниот град. Ракети доаѓале од југ, а беспилотни летала од исток.
Опасноста не заврши со првиот бран.
Воздухопловните сили подоцна соопштија дека заканата од „балистичко оружје и други средства за напад врз Киев и регионот останува“. Жителите добија повик да останат во засолништата.
Децата требаше да се вратат на училиште
Нападот дојде на денот кога украинските деца требаше да се вратат во училиштата по летниот распуст.
Регионалната воена администрација претходно предупреди да нема големи собири во областите со висок ризик. Причината беше опасноста од нови руски напади.
Заканата во последните недели дополнително ја зголемија побрзите млазни дронови.
Последниот масовен напад следува по разорниот удар од минатата недела врз складиште за муниција во Мила, во Киевскиот регион. Tаму загинаа 38 лица.
