Дуа Липа повторно се најде во центарот на вниманието на социјалните мрежи, но овојпат причината е сендвичот со плескавица, кој во описот на фотографијата на која таа ужива во 4 наутро јадејќи го, е претставен како „косовски сендвич“

Светската музичка ѕвезда Дуа Липа повторно се најде во центарот на вниманието на социјалните мрежи, но овојпат причината е сендвичот со плескавица, кој во описот на фотографијата на која таа ужива во 4 наутро јадејќи го, е претставен како „косовски сендвич“. Објавата брзо предизвика лавина реакции, особено во Србија, каде дел од корисниците ја обвинија дека присвојува дел од српската гастрономска традиција.

Критичарите тврдат дека плескавицата е еден од најпрепознатливите симболи на српската скара и дека нејзиното поврзување исклучиво со Косово претставува искривување на историските и кулинарските факти. Од друга страна, бројни корисници потсетија дека слични јадења постојат низ целиот Балкан и дека различни варијанти на плескавица, ќебапи и сродни специјалитети со децении се дел од локалните кујни во повеќе земји од регионот.

Во одбрана на Дуа Липа се вклучија и нејзини обожаватели, кои нагласуваат дека таа често го промовира своето косовско-албанско потекло и локалната гастрономија со која пораснала. Според нив, означувањето на сендвичот како косовски не мора да значи негирање на неговата распространетост во другите балкански земји, туку претставува опис на верзијата што се подготвува и консумира на Косово.
Ова не е првпат храната да стане причина за национални расправи на Балканот. Во минатото слични дебати се водеа околу ајварот, баклавата, бурекот, сармата и други јадења кои низ вековите се ширеле преку различни културни влијанија и денес се сметаат за дел од традицијата на повеќе народи. Ваквите спорови често се разгоруваат на социјалните мрежи, каде прашањата за идентитетот и културното наследство лесно стануваат предмет на жестоки дискусии.

- Advertisement -

Слични расправи на Балканот не се водат само околу храната, туку и околу музиката. На оваа тема е посветен и познатиот документарен филм „Чија е таа песна?“ на бугарската режисерка Адела Пеева, кој беше снимен во 2003 година. Во филмот, Пеева патува низ повеќе балкански земји во обид да го открие потеклото на една популарна мелодија, а речиси сите луѓе во земјите што ги посетува тврдат дека песната е токму нивна. Она што започнува како потрага по потеклото на една песна прераснува во интересна студија за националниот идентитет и за потребата на балканските народи да присвојуваат делови од заедничкото културно наследство.