Турчин уапсен на белградскиот аеродром пред да влезе во авион

Телото на руската државјанка Људмила Туркова Константиновна (28), која се водеше за исчезната од 25 јули, е пронајдено во куфер во каналот Визељ, во населбата Падинска Скела во Белград, Србија откако службено куче го довело водичот до местото.

За убиството е осомничен 25-годишниот турски државјанин К. Е., кој бил уапсен на аеродромот „Никола Тесла“ при обид да ја напушти земјата.

Според првичните информации, критичната вечер Људмила се подготвувала за излегување во клуб, но засега нема потврда дали стигнала на планираната локација.

- Advertisement -

Последната комуникација со неа била регистрирана во 23:15 часот, по што ѝ се губи секој траг, а нејзините профили на социјалните мрежи биле неактивни.

Пријателка на исчезнатата за српските медиуми изјавила дека за официјално пријавување на случајот во полицијата било потребно да се почека извештајот од Интерпол, кој претходно го поднела нејзината мајка во Русија.

28-годишната Људмила од Санкт Петербург допатувала во Србија на двонеделен одмор и изнајмила сместување во Београд. Минатата сабота планирала да излезе во ноќен клуб. Последната порака ја испратила во 23:15 часот, кога ѝ јавила на мајка си дека е во прошетка со пријателки и дека ќе се јави следниот ден. Потоа повеќе не била достапна, не се вратила по своите работи и не била активна на социјалните мрежи.

На снимки од надзорните камери се гледа како еден маж и Људмила заедно влегуваат во зграда насмеани и држејќи се за раце. На втората снимка од следниот ден се гледа маж кој со напор влече куфер завиткан во чаршаф, идентичен со оној што подоцна бил извлечен од каналот.

Истражителите се сомневаат дека К. Е. ја убил Људмила во неделата наутро во изнајмен стан во белградската населба Борча. Тој потоа го ставил телото во куфер, го одвел до блискиот канал Визељ и го фрлил во водата. Делот каде што е пронајден куферот е тешко пристапен и обраснат со ниска вегетација во областа Падинска Скела, поради што никој не го забележал со денови.

По потрагата во која учествуваа и полициски кучиња, службеното куче Аки го довело својот водич, полицаецот Владан Ковачевиќ, директно до местото на каналот каде што се наоѓал куферот.

Осомничениот е уапсен на аеродромот „Никола Тесла“, тој ја поминал пасошката контрола, но бил уапсен пред да влезе во авионот. По налог на Вишето јавно обвинителство во Белград, одредено му е полициско задржување до 48 часа, по што ќе биде сослушан за тешко убиство.

Според мајката на Људмила, нејзината ќерка дошла во Белград како турист, за да ги посети пријателите кои веќе некое време живеат таму.

Како што изјави таа, ќерка ѝ последен пат стапила во контакт со неа на 25 јули околу 23:20 часот, кога ѝ испратила порака дека излегува со пријателките што дошла да ги посети во Белград. Таа додаде дека ќерка ѝ напишала оти е добро и дека ќе ѝ се јави следниот ден.

– Ми испрати порака дека излегла со девојките, дека сè е во ред и дека ќе се јави утре. Тоа беше во 23:20 часот. Не знам каде отиде. Потоа, повеќе не стапи во контакт со мене – изјавила нејзината мајка Јулија за порталот 360.ru.

Мајката на исчезнатата жена од Санкт Петербург открила дека нејзината ќерка изнајмила стан во Белград на една недела. Нејзините пријатели ја барале во станот, но било јасно дека таа не се вратила по кобната ноќ.

– Таа никогаш не се вратила да ги собере своите работи – додала таа.

Телото на починатата жена е пренесено на обдукција, а понатамошната истрага треба да ги утврди точните причини и околности под кои настапила смртта.