Скандал во Џангал Бич кај Градиште: Малолетници алкохолизирани на организирана забава крај Охрид

Нов скандал на плажата Џангал Бич, во комплексот Градиште крај Охрид. Повторно затекнати дузина посетители малолетници, на кои им бил точен алкохол, дознава редакцијата на Охридскај.

На вчерашната забава, која била организирана од страна на сопствениците на Џангал Бич, по претходна дојава до СВР Охрид, реагирале од одделот за општ и економски криминал.

При увид на плажата Џангал Бич било констатирано дека сопствениците не само што пропуштале малолетници на забавата, туку и на нив им точеле алкохолни пијалоци.

- Advertisement -

Гледка за срам, алкохолизирани малолетници на организирана алкохолна забава, до кога?

Според Законот за трговија на Република Северна Македонија, трговецот на мало не смее да врши продажба на алкохолни пијалоци и цигари на лица под 18 години, а е должен и на видно место во продажниот објект да истакне соодветна порака за оваа забрана, како и да ја утврди возраста на купувачот при продажба. Според пријавени случаи, доколку малолетник е затекнат да купува или консумира алкохол, одговорност сносат и родителите, но и лицето кое го продава или служи алкохолот, при што казните се движат во висина од 500 до 5.000 евра.

Останува да се види дали надлежните институции ќе преземат конкретни мерки против сопствениците на Џангал Бич, или овој настан ќе остане уште еден во низата случаи што поминуваат без соодветна санкција.