Франција и Шпанија продолжуваат да се борат со шумските пожари и очекуваат нов топлотен бран

Франција и Шпанија продолжија да се борат со шумски пожари во четврток, и иако некои жаришта се смирија, властите остануваат во состојба на висока готовност поради високите температури и ризикот од нови разгорувања.

Во Франција, активни пожари беа пријавени во департманите Жиронд, Вар и Кот-д’Ор, а 21 департман останаа под портокалова тревога поради топлотниот бран, објави BFMTV.

Четири пожарникари беа повредени додека се бореа со пожар во департманот Вар пред пожарот да биде ставен под контрола преку ноќ. Еден пожарникар претрпе фрактура, а другите се здобија со полесни повреди од вдишување чад.

- Advertisement -

Интервенциите во областа останаа тешки поради високите температури и очекуваното враќање на југозападните ветрови во текот на денот.

Во департманот Жиронд, пожарникарите изразија оптимизам по мирната ноќ, бидејќи временските услови го олеснија контролирањето на ситуацијата.

Во департманот Кот-д’Ор, пожарот е локализиран, но сè уште не е ставен под контрола. Пожарот се прошири на 141 хектар, од кои 80 хектари се изгорени.

Француските департмани Мозел и Мерт-ет-Мозел беа ставени во црвен аларм во четврток поради многу висок ризик од шумски пожари, додека уште 29 департмани беа под портокалов аларм, главно на североистокот од земјата. Департманот Вар, исто така, се соочува со висок ризик од пожари.

Во Жиронд, две лица беа уапсени преку ноќ под сомнение за предизвикување шумски пожар, соопшти префектурата на департманот во четврток наутро.

Во Шпанија, операциите за гаснење пожари во текот на ноќта во северозападната покраина Замора доведоа до намалување на нивото на опасност откако беа стабилизирани две критични линии на ширење на пожарот. Сепак, остануваат неколку активни области и жаришта. Според весникот „Ел Паис“, 14 села се евакуирани поради пожарот.

Шпанските пожарникари изразија загриженост за очекуваното зголемување на ветровите попладне, како и за високите температури.

Во меѓувреме, продолжуваат напорите за ставање под контрола на претходно стабилизираните пожари во покраините Авила, Мадрид и Толедо за да се спречи нивно повторно разгорување.

Властите, исто така, ги следат другите активни жаришта во Кастелон и Тарагона, додека земјата се подготвува за уште еден топлотен бран.