Големите шумски пожари во близина на Мадрид и натаму се вон контрола

Големите шумски пожари во близина на Мадрид и натаму се вон контрола. Според шпанското Министерство за внатрешни работи, само во подрачјето на главниот град околу 25.000 луѓе биле повикани да ги напуштат своите куќи и станови.

Големиот пожар таму е „на својот врв“ и во моментов „не може да биде изгаснат“, изјави раководителот на цивилната заштита на регионалната влада, Карлос Новиљо. Поради силниот ветер што моментално дува, пожарот може дополнително да се прошири.

Меѓу вкупно 63.000 лица кои биле евакуирани или им било наредено да останат во затворени простории, според шпанското Министерство за внатрешни работи, имало и 5.000 туристи сместени во камп.

- Advertisement -

Претседателката на регионот Мадрид, Исабел Дијаз Ајусо, пожарот го опиша како „најтешкиот пожар во историјата“ на регионот Мадрид и како „катастрофа“.

Според властите, два од трите пожари западно од шпанската престолнина веќе се споиле во еден огромен пожар. Тој се движи кон општината Навас дел Реј, која се наоѓа на околу 50 километри од главниот град, и според локалните претставници бил на чекор да се спои со уште еден шумски пожар во соседниот регион Кастиља и Леон.

Уште еден пожар во Авила, околу 90 километри западно од Мадрид, според властите, исто така се заканува да се спои со другите големи пожари. Досега, само таму, според податоците на Министерството за внатрешни работи, изгореле до 15.000 хектари површина.

Според дописништвото на АРД, во моментов нема опасност за самиот Мадрид. Сепак, небото над градот е обоено во портокалова боја, во голем дел од градот се чувствува мирис на пожар, а на земјата се таложи пепел.

Во врска со пожарот во Авила, шпанската жандармерија соопшти дека уапсила едно лице. Како што се вели, станува збор за човек кој користел земјоделска машина во област каде што тоа било строго забрането поради опасност од пожари.

Искрите што настанале при работата со машината најверојатно го предизвикале пожарот. Против уште едно лице се води истрага.