Енди Барнам, член на британската Лабуристичка и Кооперативна партија, беше именуван за нов премиер на Обединетото Кралство. Како што соопштија од Бакингемската палата, кралот Чарлс му го довери мандатот за состав на новата влада

Енди Барнам, член на британската Лабуристичка и Кооперативна партија, беше именуван за нов премиер на Обединетото Кралство. Како што соопштија од Бакингемската палата, кралот Чарлс му го довери мандатот за состав на новата влада.

Веста за новиот премиер брзо го обиколи светот, но особено внимание привлече видеото со кое неговото именување беше најавено на социјалните мрежи. На официјалниот профил на британската влада на Тик-Ток беше објавено видео кое започнува со кадар од чевлите на Барнам. Потоа тој поминува низ вратата и се поздравува со присутните во просторијата.

Меѓутоа, она што предизвика вистинска лавина реакции беше звукот кој го следеше видеото. Доаѓањето на Барнам на новата функција беше најавено со препознатливата реченица од популарното ријалити-шоу „Love Island“: Оваа недела во вилата пристигнува нова секси бомба, по што започнува песната „Don’t Call Me Up“ на шведската пејачка Мејбел Меквеј.

- Advertisement -

Необичниот начин на претставување на новиот премиер собра стотици коментари, а многумина беа збунети што ваква содржина е објавена на официјален владин профил.

– Интересен начин за претставување на нов премиер; Како ова заврши на официјалниот профил?; Затоа никој не нè сфаќа сериозно; Кој и да им дал слобода на практикантите, ја има мојата почит; Ме насмеавте; Не можам да лажам, ова е навистина смешно; Ова е најдобрата објава што сте ја споделиле – гласеа дел од реакциите.

Сепак, не сите беа воодушевени од ваквиот пристап. Дел од корисниците сметаа дека владата не треба да користи ваков комичен стил на комуникација.

– Смешно е кога компаниите се однесуваат вака на социјалните мрежи, но не и владата; Дали е ова шега? Нè правите будали; Ова е едноставно чудно – напишаа критичарите.