УКРАИНЦИТЕ ПРОТЕСТИРААТ ПОРАДИ РАЗРЕШУВАЊЕТО НА МИНИСТЕРОТ ЗА ОДБРАНА

Протестите против одлуката на украинскиот претседател Володимир Зеленски да го разреши министерот за одбрана Михајло Федоров продолжија денеска – трет ден по ред во Киев и во други градови низ Украина.

Според државната новинска агенција „Укринформ“, голем број демонстранти бараат и разрешување на главниот командант на украинската армија, Олександр Сирски, кого го сметаат за претставник на постарата воена гарнитура што се спротивставува на реформите.

Во рамки на големата реконструкција на Владата, Зеленски оваа недела ги разреши премиерката Јулија Свириденко и Федоров, кој на функцијата министер за одбрана беше само шест месеци.

- Advertisement -

Триесет и петгодишниот Федоров важи за реформатор кој го реорганизираше системот за набавки во армијата и силно се залагаше за модернизација и дигитализација на украинските вооружени сили.

Сепак, како што и самиот признава, Федоров подолго време е во судир со генералот Сирски. На крајот Зеленски реши да му даде поддршка на главниот командант и има намера за нов министер за одбрана да го предложи Јевхен Хмара, актуелен вршител на должноста директор на Службата за безбедност на Украина (СБУ).

Ова е четврта смена на украински министер за одбрана од почетокот на целосната руска инвазија во февруари 2022 година.

Поранешниот министер за внатрешни работи Игор Клименко првично беше меѓу кандидатите за ресорот одбрана. Зеленски, сепак, соопшти дека Клименко ќе биде нов секретар на Советот за национална безбедност.

Досега оваа функција ја извршуваше поранешниот министер за одбрана Рустем Умеров, кој подолг период ги предводеше преговорите со САД и со Русија за завршување на војната. Неговата понатамошна политичка иднина засега останува неизвесна.

Во рамки на владините промени, Зеленски му ја понуди функцијата шеф на украинската мисија во Европската Унија во Брисел на Тарас Качка, досегашен заменик-премиер задолжен за европската интеграција.

Украинскиот парламент вчера го потврди Серхиј Корецки за нов премиер на земјата. Поранешниот директор на државната енергетска компанија „Нафтогас“ ја доби поддршката од 289 пратеници, што е значително повеќе од потребните 226 гласови.

Ова е втора промена на премиерската функција во Украина од почетокот на руската инвазија.