По речиси осум години од една од најголемите инфраструктурни трагедии во Италија, судот во Џенова денеска изрече првостепена пресуда против 32 од вкупно 57 обвинети за уривањето на мостот Моранди, во кое на 14 август 2018 година загинаа 43 лица. Судењето траеше четири години, а истрагата пред неговиот почеток уште четири.
Најтешка казна доби поранешниот извршен директор на Autostrade per l’Italia, Џовани Кастелучи, кој е осуден на 12 години затвор за повеќекратно убиство од небрежност и пропусти во одржувањето на мостот. Неговиот адвокат најави жалба, тврдејќи дека Кастелучи е неправедно претставен како единствен виновник.
На 11 години затвор е осуден поранешниот директор за одржување, Микеле Донфери Мители, додека поранешниот директор на инженерската компанија SPEA, Антонино Галата, доби казна од пет години и шест месеци затвор. Изречени се и повеќе други затворски казни, во распон од околу две до 12 години.
Обвинителството тврдеше дека раководството на компанијата и инженерите со години ги игнорирале предупредувањата за сериозната корозија и слабеењето на носечките кабли, а неопходните санации биле одложувани за да се намалат трошоците. Одбраната, пак, тврдеше дека главната причина за несреќата бил конструкциски недостаток на мостот, а не занемареното одржување.
Од преостанатите обвинети, 25 беа ослободени или дел од обвиненијата против нив отпаднаа поради застареност. Обвинителството првично бараше речиси 400 години затвор за 56 обвинети, а највисоката побарана казна за Кастелучи беше 18 години и шест месеци.
Трагедијата предизвика силен политички потрес во Италија и отвори прашања за состојбата на националната инфраструктура и одговорноста на приватните концесионери. Стариот мост беше целосно урнат, а во 2020 година на негово место беше пуштен во употреба новиот мост „Џенова Сан Џорџо“, проектиран од познатиот архитект Ренцо Пијано.
Несреќата предизвика спор меѓу холдинг компанијата „Атлантија“, контролирана од семејството Бенетон, и тогашната влада, кој заврши со продажба на контролниот удел на „Атлантија“ во компанијата „Автостраде“.
Сегашниот директор на „Автостраде“ вчера испрати отворено писмо во кое ја повтори посветеноста на компанијата да обезбеди слична трагедија никогаш да не се случи повторно.
„Сакам да им се извинам на семејствата на жртвите, жителите на Џенова и на сите Италијанци за страдањето предизвикано од трагедијата на мостот Моранди, целосно свесен дека нашето извинување никогаш нема да може да ја избрише нивната болка“, напиша директорот на „Автостраде“, Ариго Џана.
