Кој протекол информации за авионот на Трамп?

Мобилни телефони биле собирани од службеници во Белата куќа, додека ФБИ и кабинетот на американскиот претседател воделе интензивна потрага по лицето што протекло информации за безбедносните слабости на новиот претседателски авион. Истрагата почнала откако Доналд Трамп јавно покажал гнев по медиумските објави за авионот дониран од Катар.

Според американските медиуми, Трамп сметал дека протекувањето на информациите претставува сериозен безбедносен проблем.

– Не сакам да давам рокови, но тие прилично добро знаат, ја знаат приказната – изјави Трамп претходно за друга криза, а според извори блиски до администрацијата, сличен пристап бил применет и кон внатрешната истрага.

- Advertisement -

Шефицата на кабинетот на Белата куќа, Сузи Вајлс, и директорот на ФБИ, Кеш Пател, лично ја координирале акцијата. Канцеларија во непосредна близина на кабинетот на Вајлс била претворена во импровизирана „воена соба“, од каде со часови се координирала потрагата по изворот на информациите.

Покрај проверките на мобилните телефони, истражителите разговарале со службеници од повеќе институции кои биле вклучени во организацијата на патувањата на американскиот претседател. Дел од вработените одбиле да ги предадат своите уреди.

Безбедносните слабости ја отворија аферата

Целата истрага започнала по медиумските извештаи дека новиот „Боинг 747“, кој Катар го донирал за претседателска употреба, не ги исполнува сите безбедносни стандарди на актуелниот претседателски авион.

Според извори запознаени со проценките, авионот бил набрзина опремен со дел од потребните одбранбени системи, но сè уште не нудел исто ниво на заштита како специјално модифицираниот претседателски авион што со години го користат американските претседатели.

Поради тоа, Трамп на едно од последните патувања користел постар авион, додека новата леталка била испратена во британската база Милденхол.

Судски покани за новинарите

Истрагата дополнително предизвика реакции откако американското Министерство за правда испратило судски покани до новинари кои пишувале за случајот.

„Њујорк тајмс“ побарал поништување на поканите и оценил дека тие претставуваат напад врз слободата на медиумите.

„Њујорк тајмс денес поднесе барање за поништување на нелегалните и несоодветни судски покани што им беа доставени на тројца од нашите новинари“ – изјави Дејвид МекКроу, главен правен советник на весникот.

Авион од 400 милиони долари во центарот на спорот

Политичката бура во Вашингтон започна откако се појавија информации дека авионот вреден околу 400 милиони долари не е целосно подготвен за претседателски летови надвор од САД.

Трамп јавно ги минимизираше безбедносните дилеми.

„Немаше никаква безбедносна загриженост. Го испративме порано за американските војници да можат да го видат“ – изјави американскиот претседател.

Сепак, извори од безбедносните служби тврдат дека токму безбедносните проценки биле главната причина поради која новиот авион не бил користен за дел од патувањата на Трамп.