Франција и Шпанија вечерва играат за место во финалето

Разврската за светската титула почнува вечерва со вистински фудбалски спектакл. Во првото полуфинале на Светското првенство, Франција и Шпанија ќе ги одмерат силите во Далас, а победникот ќе обезбеди место во големото финале.

Франција, актуелен светски вицешампион и двократен светски првак, ќе се обиде да избори пласман во своето петто мундијалско финале. „Триколорите“ светската титула ја освојуваа во 1998 година против Бразил и во 2018 година против Хрватска.

Од другата страна е европскиот шампион Шпанија, која досега има една светска титула. „Црвената фурија“ единственото мундијалско финале го одигра и го освои во 2010 година, кога по продолженија ја совлада Холандија.

- Advertisement -

Историјата покажува дека двете селекции само еднаш се сретнале на Светско првенство. Тоа беше во осминафиналето во 2006 година, кога Франција славеше со 3-1.

Добра вест за Французите е што нивната најголема ѕвезда Килијан Мбапе ќе биде подготвен за настап. Селекторот Дидие Дешан потврди дека напаѓачот целосно се опоравил од повредата на зглуждот што ја заработи во четвртфиналето.

– Килијан се чувствува добро, тој е 100 проценти подготвен“, изјави Дешан на прес-конференцијата во Далас.

Мбапе досега има осум голови и три асистенции на турнирот, а заедно со Лионел Меси е прв на листата на стрелци.

Вториот финалист ќе биде познат утревечер, кога во Атланта ќе се соочат бранителот на титулата Аргентина и Англија.

Големото финале на Светското првенство ќе се одигра в недела на стадионот „МетЛајф“ во Њу Џерси, со почеток во 21 часот по македонско време.