Срем, Мачва, дел од Колубарскиот округ и Белград се најзагрозени поради африканска свинска треска

Во Србија, најзагрозени области поради африканска свинска треска се Срем, Мачва, дел од Колубарскиот округ и Белград, каде што концентрацијата на производство на свињи е највисока, изјави денес Љиљана Ивањац од Ветеринарната управа.

Ивањац предупреди на РТС дека вирусот лесно се пренесува – може да се пренесе од луѓе преку обувки, облека, возила за испорака на храна за животни, но и преку контакт со домашни и диви свињи.|
„Апелираме до одгледувачите на свињи да ги држат своите животни затворени во трла и веднаш да пријават секое сомневање за болеста во ветеринарната служба. Не смееме да чекаме, бидејќи брзата реакција е еден од клучните начини за борба против африканската свинска треска“, рече таа.

Таа додаде дека нема опасност по здравјето на луѓето, но ги повика потрошувачите да купуваат месо исклучиво во регистрирани објекти кои се под постојан ветеринарен и инспекциски надзор.

- Advertisement -

„Ја подигнавме работата на целата ветеринарна служба на највисоко ниво. Во борбата се вклучија и други државни служби, со цел да се спречи нелегалната трговија со животни и производи и да се сузбие ширењето на болеста што е можно поефикасно“, рече Љиљана Ивањац.