Објавена последната снимка од атентаторката од Монако пред експлозијата

Се појавија нови детали за бомбашкиот напад во Монако, во кој беше повреден украинскиот олигарх Вадим Јермолаев, како и за смртта на Анастасија Березовска, жената осомничена дека ја активирала експлозивната направа.

Според украинскиот портал „Страна“, Березовска наводно прифатила да го изврши нападот во замена за ветена награда од 150.000 евра. Истиот извор наведува дека ѝ биле исплатени 7.000 евра за извршувањето на нападот, како и дополнителни 4.300 евра за трошоци, додека не е познато што се случило со остатокот од договорената сума.

Според објавените информации, парите биле префрлени на криптовалутен паричник и на банкарски сметки што гласеле на името на 39-годишната Украинка. Украинската служба за безбедност (СБУ) соопшти дека Березовска била во контакт со двајца мажи кои подоцна биле уапсени под сомнение дека се вмешани во нејзиното убиство. Според СБУ, двајцата вршеле парични трансакции кон нејзините сметки.

- Advertisement -

Еден од уапсените, според достапните информации, е активен офицер на Главната разузнавачка управа при Министерството за одбрана на Украина (ГУР). За време на истрагата, тој наводно изјавил дека дејствувал самостојно, без знаење и одобрение од службата.

Околностите под кои е убиена Березовска сè уште не се целосно разјаснети. Посебно внимание на истражителите привлекол подрумот од куќата на поранешен полицаец, кој исто така е осомничен во случајот.

На снимките што ги објавија медиумите се гледа душек со траги што наликуваат на крв, две секири, копач, церада поставена на подот и голема торба, што поттикна шпекулации дека просторијата можеби била користена за мачење. Сепак, овие тврдења досега не се официјално потврдени.

Во меѓувреме, францускиот портал „L’Actu“ објави снимка од безбедносна камера за која тврди дека ги прикажува последните забележани моменти од животот на Березовска пред експлозијата во Монако. На видеото се гледа како таа влегува во продавница во францускиот град Бозоле, во близина на границата со Монако, каде што купува преносен полнач за мобилен телефон.

Според продавачот, жената не зборувала англиски јазик и со своето однесување не предизвикала никакво сомневање, бидејќи, како што изјавил, изгледала „сосема нормално“.

Истрагата за бомбашкиот напад во Монако, како и за убиството на Анастасија Березовска, сè уште е во тек. Надлежните служби во Франција и Украина продолжуваат да ги утврдуваат сите околности поврзани со двата случаи.