Сакал да ѝ ја бакне раката на сопругата на Ердоган, но таа ја повлече

Францускиот претседател Емануел Макрон се најде во центарот на вниманието за време на официјалниот прием во Анкара, откако турските медиуми објавија дека се обидел да ѝ ја бакне раката на сопругата на турскиот претседател, Емине Ердоган, но таа ја повлекла раката и не го прифатила гестот.

Макрон пристигна во Анкара за да учествува на 36. самит на НАТО и присуствуваше на гала вечера организирана за шефовите на држави и влади и нивните сопружници, објави турскиот портал „Хаберлер“.

На влезот во Претседателскиот комплекс тој беше пречекан од турскиот претседател Реџеп Таип Ердоган и неговата сопруга Емине Ердоган.

- Advertisement -

Според снимките што ги објавија турските медиуми и кои се споделуваат на социјалните мрежи, Макрон при поздравувањето се наведнал кон Емине Ердоган, по што таа ја повлекла раката. Турските медиуми тврдат дека францускиот претседател имал намера да ѝ ја бакне раката, но гестот не бил прифатен.
Според „Хаберлер“, моментот бил снимен за време на официјалното пречекување на учесниците на самитот.

Турскиот претседател Реџеп Таип Ердоган и неговата сопруга беа домаќини на прием и свечена државна вечера за лидерите на земјите членки на НАТО и нивните сопружници.

На приемот во Претседателскиот комплекс присуствуваа лидерите на 32-те земји членки на Алијансата, како и претставници на партнерските држави од Индо-Пацификот – Австралија, Јапонија, Нов Зеланд и Јужна Кореја, заедно со други поканети високи функционери.

Ердоган и неговата сопруга лично ги поздравија сите гости пред главната зграда на Претседателскиот комплекс, по што беше направена заедничка фотографија. На неа Макрон и неговата сопруга Брижит Макрон стоеја од десната страна на Ердоган и Емине Ердоган, додека американскиот претседател Доналд Трамп беше позициониран од нивната лева страна.

За време на приемот беше послужена традиционална турска кујна, а гостите беа пречекани со настап на Воениот оркестар на Турските вооружени сили.