Медведев се најде во фокусот на јавноста откако на социјалните мрежи се појави видео од конгресот на владејачката партија „Единствена Русија“, на кое се гледа како заспива за време на говорот на рускиот претседател Владимир Путин

Поранешниот руски претседател Дмитриј Медведев се најде во фокусот на јавноста откако на социјалните мрежи се појави видео од конгресот на владејачката партија „Единствена Русија“, на кое се гледа како заспива за време на говорот на рускиот претседател Владимир Путин.

Настанот се одржал во неделата, а на снимката Медведев седи во првиот ред, помеѓу рускиот амбасадор во Белорусија Борис Гризлов и секретарот на Генералниот совет на партијата Владимир Јакушев. Во еден момент, додека Путин се обраќа од сцената, Медведев ги затвора очите и изгледа како да задремал.

Камерите го забележаа моментот кога Путин изјави дека Русија располага со доволно „сила, ресурси и политичка волја“ за да одговори на сите предизвици.

- Advertisement -

Во своето обраќање, Путин порача дека државата е свесна за проблемите, но ќе ја гарантира безбедноста на земјата, заштитата на граѓаните и неповредливоста на границите.

– Ги гледаме проблемите, свесни сме за нив и реагираме на нив, но сигурно ќе ја обезбедиме безбедноста на нашата земја и граѓаните, како и неповредливоста на границите на Русија. Несомнено ќе ги надминеме сите предизвици со кои се соочуваме денес, вклучително и терористичките напади врз нашата територија и инфраструктура – изјави Путин.

Тој додаде и дека украинските сили се повлекуваат по линијата на фронтот, додека Киев го обвини за „терористички напади“, а Западот за игнорирање на нападите врз цивилната инфраструктура, истовремено воведувајќи нови санкции врз Москва.

Путин потврди и дека изборите за долниот дом на рускиот парламент ќе се одржат во септември, во целосна согласност со законот.

Ова не е првпат Медведев да се најде во слична ситуација. За време на обраќањето на Путин за состојбата на нацијата во 2023 година, камерите исто така го забележаа како седи со затворени очи меѓу високи државни функционери и воени претставници.

Видеото од најновиот конгрес брзо се прошири на социјалните мрежи и предизвика бројни реакции и коментари од корисниците.