Мексико гази на Мундијалот, Јужна Африка испиша бајка

Бразил ја заврши работата за Босна и Херцеговина. Победата од 3:0 над Шкотска ги отвори вратите за историски пласман на БиХ во нокаут-фазата на Светското првенство, а Сараево експлодираше од радост.

Иако босанската репрезентација претходно го совлада Катар со 3:1 и го освои третото место во групата, конечната потврда за пласманот пристигна по триумфот на Бразил. Со тоа стана јасно дека БиХ ќе биде меѓу репрезентациите кои продолжуваат во елиминациската рунда како една од најдобрите третопласирани селекции.

Следуваше вистинско фудбалско лудило. Илјадници навивачи излегоа на улиците во Сараево, Тузла, Зеница и во другите градови. Автомобилски колони, сирени, знамиња и песни одекнуваа до доцна во ноќта, а сообраќајот во делови од Сараево речиси целосно запрел.

- Advertisement -

Додека Босна славеше, драмата продолжи и на терените во Северна Америка.

Мексико гази без милост

Мексико ја потврди улогата на еден од најсериозните кандидати за висок пласман. Домаќините ја совладаа Чешка со убедливи 3:0 и ја завршија групната фаза со максимален ефект, три победи и без примен гол.

Селекторот Хавиер Агире ротираше дел од составот, но и покрај тоа неговиот тим целосно доминираше. Отпорот на Чесите беше скршен во 55. минута кога Матео Чавез ја затресе мрежата.

Само седум минути подоцна Хулијан Кињонес ја искористи конфузијата во одбраната на Чешка и зголеми на 2:0. Конечниот удар го зададе Алваро Фидалго во судиското продолжение.

Посебни овации доби легендарниот голман Гиљермо Очоа, кој влезе од клупата во завршницата и уште еднаш испиша страница во својата мундијалска приказна.

Мексико сега има серија од 11 натпревари без пораз и влегува во нокаут-фазата со огромна самодоверба.

Јужна Африка ја испиша својата бајка

Најголемото изненадување во групата го приреди Јужна Африка.

На Кореја ѝ беше доволен и бод за сигурен пласман, но Африканците не сакаа калкулации. По неколку опасни контранапади и пропуштени шанси, Масеко во 63. минута конечно ја испрати топката во мрежата за голема победа од 1:0.

Корејците делуваа непрепознатливо. Нивната игра беше бавна, додавањата непрецизни, а вистински одговор на примениот гол не стигна до самиот крај.

За Јужна Африка ова е историски успех. Во својот четврти настап на Светските првенства за првпат обезбеди место во нокаут-фазата.

Следен ривал ќе биде Канада.

Нов ден, нова мундијалска математика

Единаесеттиот ден од шампионатот носи нови пресметки во групите Е, Ф и Г.

Германија веќе обезбеди пласман понатаму, но вистинската драма допрва следува. Брегот на Слоновата Коска, Еквадор и сензацијата Курасао остануваат во игра за следната рунда.

Особено внимание привлекува Курасао, најмалата држава која успеала да се пласира на Мундијал. По тешкиот пораз од Германија и ремито со Еквадор, островјаните вечерва против Брегот на Слоновата Коска ќе бркаат чудо и историски пласман.

Во Ф-групата, пак, Холандија, Јапонија и Шведска водат жестока битка за местата во елиминациите. Тунис има само теоретски шанси, но на Светските првенства чуда се случувале и во многу покасни фази.

Американците веќе се сигурни патници во нокаут-фазата, но вечерва ги очекува жешка атмосфера против Турција. Турците немаат друг избор освен победа ако сакаат да останат во игра.

Мундијалот влегува во највозбудливиот дел, а Сараево веќе покажа како изгледа кога една нација ќе почувствува дека сонот станува реалност.