Министерот Хоџа ги демантира шпекулациите дека цементарницата ќе добие дозвола по стари правила

Министерот за животна средина и просторно планирање Муамет Хоџа на вечерашното гостување во емисијата „Топ тема” на телевизија Телма, ја демантираше информацијата дека цементарницата УСЈЕ ќе добие дозвола по стари правила.

– По барање на МЖСПП, УСЈЕ уште сега ќе ги имплементира најновите и построги еколошки стандарди, иако новиот закон за индустриски емисии стапува на сила дури во септември 2027 година. Истото ќе важи за сите оператори кои поседуваат А интегрирана еколошка дозвола”- истакна Хоџа. Со оглед на тоа што по 2027 година сите дозволи ќе мора да се ревидираат, според министерот, логично е секое тековно обновување да се врши според идните, повисоки критериуми за заштита на амбиенталниот воздух и околината.

Хоџа истакна и дека институционалниот рок за увид во барањето за дозвола за УСЈЕ сè уште тече.

- Advertisement -

– Барањето за дозвола беше јавно објавено на 22 мај на веб-страницата на Министерството и уредно доставено до Општина Кисела Вода и Град Скопје. Законскиот рок за поднесување забелешки трае до 22 јуни. Во првата недела од јули ќе се одржи јавна расправа на територијата на Општина Кисела Вода, каде што е лоцирана фабриката. Заради целосна транспарентност, Министерството јавно ќе го објави целиот записник – рече министерот Хоџа.

Според него, протестот е загарантирано уставно право кое тој секогаш го поддржуваа, но во овој случај има јасна законска процедура.

– Имаме отворен дијалог и претстојна јавна расправа – ги повикувам сите граѓани и активисти активно да се вклучат – рече министерот во „Топ тема”, истакнувајќи дека со досегашните разговори крајната цел е веќе постигната: УСЈЕ ќе работи под далеку построги стандарди од досегашните.