Американците извршија напади врз ирански позиции, Иранците нападнаа воздухопловна база

Во ново затегнување на односите меѓу Иран и САД, Иранската револуционерна гарда денес објави дека таргетирала воздухопловна база за која тврделе дека била искористена во американскиот напад врз телекомуникациска кула на островот Сирик.

САД соопштија дека извршиле напади врз ирански воени цели во текот на викендот, додека Иранската револуционерна гарда во понеделник соопшти дека погодила американска база како одговор, што е најновиот во серијата меѓусебни напади во време на разговори за прекин на тримесечната војна.

Нападите на брегот на Персискиот Залив на Иран беа извршени како одговор на „агресивните ирански дејствија што вклучуваа соборување на американски дрон MQ-1 што дејствуваше над меѓународни води“, соопшти Централната команда на САД (CENTCOM) во објава на мрежата X.

- Advertisement -

„Американските борбени авиони брзо реагираа уништувајќи ја иранската воздушна одбрана, контролна станица на копно и два дрона за еднократна употреба што претставуваа јасна закана за превозот во регионалните води“, соопшти CENTCOM.

Тие додадоа дека ќе продолжат да ги штитат американските средства и интереси за време на тековното примирје.

Иранската Исламска револуционерна гарда во понеделник соопшти дека таргетирала воздухопловна база што ја користат САД за лансирање напади врз јужен Иран, без да прецизира во која база.

Воздушната одбрана во Кувајт, каде што се наоѓа голема американска база, во понеделник пресретнала ракетни и беспилотни летала, додека сирените се огласиле низ целата земја, објави државната новинска агенција КУНА, без да даде дополнителни детали.

САД и Иран разменуваат спорадични напади откако прекинот на огнот стапи на сила на почетокот на април, додека разговорите за потрајна спогодба се одолговлекуваат. Слична размена се одржа минатиот четврток, а двете страни ја опишаа на сличен начин.