Демонстрантите порачаа „Разбијте ја социјалистичката мафија“

Илјадници луѓе денеска излегоа на протести во Мадрид, на кои го повикаа шпанскиот премиер Педро Санчез да поднесе оставка по низата корупциски скандали поврзани со неговата влада.

За време на протестите, полицијата приведе неколку маскирани лица откако група демонстранти се обиде да ги пробие бариерите околу резиденцијата на Санчез.

На протестот учествуваа околу 40.000 луѓе кои бараа предвремени општи избори. Демонстрантите носеа шпански знамиња и транспаренти со натписи „Разбијте ја социјалистичката мафија“, пренесува дневниот весник „Паис“.

- Advertisement -

Лидерите на опозициската Народна партија и на крајно десничарската партија Вокс исто така учествуваа во главно мирниот марш. Протестот го предводеа лидери на шпанското граѓанско општество, како Маркос де Кинто, и политичари, меѓу кои и пратеници во Европскиот парламент од групата Вокс.

Шпанскиот суд во вторникот објави дека поранешниот шпански социјалистички премиер Хозе Луис Родригез Запатеро е под истрага бидејќи наводно предводел мрежа за трговија со влијание и перење пари. Запатеро, кој е сојузник на актуелниот премиер, негираше каква било незаконска дејност.