Поплави во Бугарија после обилните дождови

Спасувачки нуркачи, пожарникари и полицајци во Бугарија спасија 17-годишно момче што денеска влегло во надојдената река Јантра кај селото Шемшево, во областа Велико Трново, во момент кога регионот се справува со последиците од силното невреме и со поплавите, јавуваат бугарските медиуми.

Обилните дождови што ја зафатија Бугарија предизвикаа сериозни поплави и вонредна состојба во повеќе региони, откако неколку реки излегоа од своите корита и поплавија куќи, дворови, улици и индустриски зони.

Во Велико Трново ситуацијата останува сериозна по силните поројни дождови кои донесоа над 80 литри на квадратен метар врнежи за кратко време. Вонредна состојба е прогласена во регионите на Велико Трново, Габрово, Горна Орјаховица и Драјново.

- Advertisement -

Реката Јантра во текот на ноќта се излеала од коритото, при што биле поплавени бројни објекти долж нејзиниот тек.

За само половина час во регионот наврнале околу 80 литри дожд на метар квадратен, додека во Килифарево биле измерени дури 125 литри. Јужниот влез во градот кон Русе исто така е затворен.

Поплави се регистрирани и во Ловеч, каде реката Вит се излеала и поплавила подруми и дворови во еден кварт на Тетевен.

Критична е состојбата и во Априлци, каде се излеале две од трите реки во градот. Во Севлиево започна евакуација на населението од улицата „Крајбрежна“ и околните улици, откако водата навлегла во урбаните делови на градот.

На одредени места нивото на водата достигнало и до 1,20 метри, а поради поплавите е прекинато водоснабдувањето и снабдувањето со електрична енергија во некои села.

Целосно е поплавено подрачјето на спортскиот комплекс „Локомотива“ во Дрјаново. Пристапот до мостот што води до стадионот е ограничен, додека мостот кон железничката линија и улицата Поп Харитон е сериозно загрозен, јавуваат локалните медиуми.

Поплавите предизвикаа сериозни штети на возила и патна инфраструктура. Затворени се патиштата кон Стара Загора и Габрово, бидејќи реката навлегла на коловозот.

Земјоделските насади се уништени, а водата во приземјето на куќите достигнала до колена.

Министерот за внатрешни работи изјави дека евакуацијата е превентивна поради значителен пораст на нивото на реките.

Нивото на реката Јантра во градот речиси достигнало критична висина од 7,50 метри во најниските зони.

Метеоролозите предупредуваат дека врнежите повторно ќе се интензивираат во текот на денот и утре, особено во централна и северна Бугарија. За регионите Велико Трново и Габрово е издаден портокалов аларм за опасни врнежи, додека жолт аларм останува во сила за Ловеч и делови од Враца, Монтана и Плевен.

Според прогнозите, од понеделник времето постепено ќе се стабилизира.