Македонија со нов лик против БиХ и Турција

Македонската фудбалска репрезентација ќе настапи со освежен состав на претстојните пријателски натпревари против БиХ и Tурција, откако селекторот Гоце Седлоски го објави списокот на повикани фудбалери.

Најголемо внимание привлекуваат петтемина дебитанти кои за првпат добиваат шанса во сениорскиот национален тим. Повик добија вардарците Георги Јанкулов и Азар Омерагиќ, фудбалерите на ФК Силекс Дарко Додев и Дарко Анѓелески, како и Дин Аломеровиќ од романскиот клуб УТА Арад. На списокот се најде и голманот на ФК Вардар, Давор Талески.

Во репрезентацијата повторно се враќаат дефанзивците Стефан Деспотовски и Јован Манев, како и играчите од средниот ред Агон Елези и Сефер Емини, кои не беа дел од претходните собири.

- Advertisement -

Сепак, Седлоски нема да може да смета на неколку важни имиња. Поради повреди ќе отсуствуваат Љупче Дориев, Лука Станковски, Егзон Бејтулаи, Марио Илиевски и Димитар Митровски, додека поради клупски обврски натпреварите ќе ги пропуштат Тихомир Костадинов и Андреј Стојчевски.

Пријателските натпревари против БиХ и Турција ќе бидат можност за селекторот да тестира нови решенија и да види како младите фудбалери ќе се вклопат во националниот тим пред следните официјални предизвици.