Американскиот министер за одбрана Пит Хегсет денеска го обвини сенаторот од Аризона, Марк Кели, за „можеби прекршување на својата заклетва“ со коментари на „Face the Nation“ по доверлив брифинг

Американскиот министер за одбрана Пит Хегсет денеска го обвини сенаторот од Аризона, Марк Кели, за „можеби прекршување на својата заклетва“ со коментари на „Face the Nation“ по доверлив брифинг.

– Капетанот Марк Кели е повторно во акција. Сега на телевизија изнесува (лажни и глупави) тврдења за класифициран брифинг од Пентагон што го примил. Дали повторно ја прекршил својата заклетва? Правниот оддел на Министерството за одбрана ќе го разгледа тоа – наведе Хегсет на Икс.

Кели изјави на Си-би-ес дека е „шокантно колку длабоко е навлезено во воените резерви“, кога беше прашан дали Пентагон ги информирал пратениците за влијанието на војната во Иран врз американските воени резерви.

- Advertisement -

Сенаторот одговори на тврдењата на Хегсет и истакна дека самиот министер за одбрана претходно презентирал слични информации на јавно сослушување и дека тие не се доверливи.

– Разговаравме за ова на јавна расправа пред една недела, а вие рековте дека ќе бидат потребни години за да се обноват некои резерви. Тоа не е доверливо, тоа е ваша изјава. Оваа војна има сериозна цена, а вие и претседателот сè уште не сте ѝ објасниле на американската јавност која е целта – рече Кели.

Кога беше прашан дали Пентагон го информирал Конгресот за влијанието на војната со Иран врз американските воени резерви, Кели рече дека „шокантно е колку длабоко САД навлегле во залихите на муниција“, објави Фокс њуз.

Сенаторот рече дека залихите на ракети Томахавк, воени тактички ракетни системи (ATACMS), пресретнувачи RIM-161 3 (SM-3), ракети за воздушна одбрана со голема надморска височина (THAAD) и ракети Патриот, кои се користат за одбрана на САД, се значително потрошени, додавајќи дека нивното обновување ќе трае неколку години, што би влијаело на евентуален конфликт на САД со Кина.

Повеќемесечниот спор меѓу Хегсет и Кели започна по учеството на сенаторот во видео снимка со неколку демократски конгресмени кои ги повикуваат припадниците на американската војска да не извршуваат „нелегални“ наредби.

Министерството за правда започна истрага, додека федералниот суд го блокираше Пентагон ретроактивно да го деградира Кели од чин капетан, пресудувајќи дека неговото право на слобода на говор веројатно е прекршено.

Американскиот претседател Доналд Трамп претходно ги обвини конгресмените за „предавство“ и предложи тие да бидат уапсени, по што подоцна се обиде да ја ублажи таа изјава, пишува Фокс њуз.