ОБЕДИНЕТИТЕ АРАПСКИ ЕМИРАТИ ПОД ОГАН

Обединетите Арапски Емирати соопштија дека нивната противвоздушна одбрана рано утрово одговорила на нови ракетни и беспилотни напади од Иран, што претставува нов тест за кревкото едномесечно примирје меѓу САД и Иран, пренесува Хина.

За најновиот напад врз ОАЕ, кој следуваше еден ден по размената на оган меѓу САД и Иран околу Ормуската Теснина, додека Вашингтон го очекуваше одговорот на Техеран на американскиот предлог за завршување на конфликтот, засега има малку достапни детали. Од почетокот на војната на 28 февруари, Иран често ги напаѓа ОАЕ и другите земји од Персискиот Залив каде што се наоѓаат американски воени бази.

Претходно Техеран соопшти дека биле извршени неколку напади врз нивните острови Кешм и Сири. Извори на иранската новинска агенција Тасним велат дека станува збор за заедничка операција на САД и Емиратите.

- Advertisement -

„Доколку се потврди учеството на ОАЕ, тие ќе ја платат цената за своите непријателски дејствија“, рекол изворот на агенцијата, додавајќи дека „цивилите треба да се држат подалеку од нафтените постројки“.

Нападнати три американски разурнувачи 

Американскиот претседател Доналд Трамп вчера изјави дека три американски разурнувачи биле нападнати додека минувале низ Ормуската Теснина. Според него, на бродовите не им е нанесена штета, но била предизвикана голема штета на иранските напаѓачи.

Трамп подоцна им изјави на новинарите дека примирјето сè уште е во сила и се обиде да го минимизира значењето на размената на оган.

– Денеска си поигруваа со нас. Ние ги уништивме – рече Трамп во Вашингтон.

Врховната здружена воена команда на Иран ги обвини САД за прекршување на примирјето со напад врз ирански танкер и друг брод, како и со воздушни напади врз цивилни подрачја на островот Кешм во Ормуската Теснина, како и блиските крајбрежни области Бандар Хамир и Сирик на иранското копно. Иранската војска соопшти дека возвратила со напади врз американски воени бродови источно од теснината и јужно од пристаништето Чабахар.

Портпаролот на иранската централна команда „Хатам ал-Анбија“ изјави дека иранските напади предизвикале „значителна штета“, но американската Централна команда тврди дека ниту еден брод не бил погоден. Иранската телевизија „Прес ТВ“ (Press TV) подоцна објави дека по неколкучасовната размена на оган, „ситуацијата на иранските острови и крајбрежни градови долж Ормуската Теснина сега е вратена во нормала“.

Воените капацитети на Иран не се исцрпени

И покрај неколкунеделните американски и израелски напади, Иран сè уште има значајни балистички ракетни капацитети и способност да издржи економски притисок најмалку три до четири месеци, покажува анализата на американското разузнавање доставена до Белата куќа, до која денеска имаше пристап „Вашингтон пост“ .

Еден американски функционер за весникот изјави дека проценките покажуваат дека способноста на Иран за долгорочен економски отпор е значително поголема од претходно проценетата од Централната разузнавачка агенција на САД (ЦИА).

Исто така, во анализата се наведува дека Иран сè уште има околу 75 проценти од своите мобилни системи за лансирање и околу 70 проценти од својот ракетен арсенал во споредба со периодот пред конфликтот.

Според истите изјави, постојат индикации дека Техеран успеал да ги обнови и повторно да ги отвори повеќето подземни складишта, да поправи дел од оштетените ракети, како и да состави нови ракети кои биле во завршна фаза на производство.

Американските функционери, исто така, проценуваат дека иранското раководство станало порадикално и решително, со зголемена доверба дека може да се спротивстави на политичкиот притисок од САД.