Борисов ја оцени состојбата по изборниот ден

Лидерот на ГЕРБ – СДС Бојко Борисов вечерва по завршувањето на гласањето на парламентарните избори упати честитка до првопласираните „Прогресивна Бугарија“ на Румен Радев без директно да ја спомне и искажа благодарност до граѓаните кои го дале гласот за ГЕРБ.

„Ви благодарам за секој глас за ГЕРБ. Им честитам на првите! Рамнотежата ни е јасна и ја постигнавме со оставката на кабинетот ‘Жељазков’. Без коалиции и без непринципиелни собранија. Едно е да се добијат изборите, а сосема друго е да се владее. Изборите одлучуваат кој е прв, но преговорите ќе одлучат кој ќе владее. ГЕРБ може да биде и во власта и во опозиција. Во политиката, како и во животот, потребно е трпение“, напиша Борисов на неговиот официјален фејсбук профил.

Претходно вечерва повеќе социолошки агенции ги соопштија првичните излезни анкети од денешните предвремени парламентарни избори според кои партијата на Румен Радев, „Прогресивна Бугарија“, е победник на изборите. Радев води со речиси 24 отсто пред второпласираната ГЕРБ-СДС на Борисов.