Петгодишната Магдалена Л. од Панчево, Србија, почина вчера по 8-дневна борба за живот, откако се запали куќата во која живееше со своето семејство

Петгодишната Магдалена Л. од Панчево, Србија, почина вчера по 8-дневна борба за живот, откако се запали куќата во која живееше со своето семејство, а нејзиниот татко Марко Л. (28), кој херојски се обиде да ја спаси, почина 2 дена по пожарот.

Од огнената стихија се спасија сопругата на Марко, Милијана (22) и двете помали ќерки, кои излегле низ прозорец.

Пожарот избувнал вечерта на 24 март, поради преоптоварување на електричните инсталации во кујната, а потоа се проширил со голема брзина низ целата куќа поради трска и запаливи материјали во таванот. Поради ова, покривот речиси целосно се урнал.

- Advertisement -

За трагедијата сведочеше сестрата на Милјана, Александра:

– Ги искапеа двете помлади девојчиња на возраст од 1 и 3 години, а сестра ми ги однесе во спалната соба за да ги облече. Постарата ќерка Магдалена остана да се капе во бањата, а пожарот почна во кујната. За да се стигне до бањата, мора да се помине низ кујната – раскажа Александра за српските медиуми.

Таа додаде дека сестра ѝ и зет ѝ живееле во куќата како потстанари.

– Како што ми раскажа сестра ми, одеднаш нешто пукнало, сè почнало да паѓа и избувнал пожарот. Мојот покоен зет Марко го скршил прозорецот и ѝ помогнал на Милјана безбедно да излезе со помладите девојчиња. Таа се вратила да му помогне на Марко да ја извадат најстарата ќерка, но не можела да се приближи, бидејќи веројатно сè паѓало врз нив. Марко ја зел Магдалена од кадата, а Милијана веднаш ја изнела низ прозорецот на улицата, а потоа се вратила да му помогне на Марко да излезе – раскажува сестрата Александра.

Но, Марко предолго бил во чад и му снемало сила кога дошол моментот да излезе на безбедно на улицата. Најверојатно адреналинот што го држел го напуштил во моментот кога сфатил дека неговите најблиски конечно се безбедни.

– Тој повеќе немал сила и ѝ рекол на сестра ми „Не можам, излези“. Скршил друг прозорец за да може таа да излезе. Потоа  соседите едвај го извлекле надвор на безбедно. Се бореше 2 дена за живот, но не успеа – вели Александра.

Додека Марко со девојчето се пробивал низ огнот, двајцата се здобиле со тешки изгореници на телата и вдишале премногу чад. Веднаш биле пренесени во болница каде Марко по два дена почина од повредите, а вчера почина и детето.

Полицијата добила пријава дека куќата гори околу 19:50 часот, а противпожарната бригада брзо реагирала.

Јавното обвинителство спроведе истрага за да се утврди причината за пожарот.

– Утврдено е дека пожарот најверојатно настанал поради преоптоварување на електричните инсталации во зградата, загревање на каблите и палење на таванот на објектот, кој е направен од трска и други лесно запаливи материјали – изјавија од полицијата.

Роднините и пријателите со трогателни пораки се простуваат од двете жртви на трагедијата на младото семејство.