Цените на нафтата пораснаа за повеќе од шест проценти, а азиските акции паднаа по изјавите на Трамп за Иран

Цените на нафтата пораснаа за повеќе од 6 проценти, а азиските акции паднаа откако американскиот претседател Доналд Трамп во своето прво обраќање до нацијата од почетокот на војната со Иран изјави дека САД ќе продолжат да го напаѓаат Иран „многу силно“.

Трамп, исто така, во синоќешниот говор рече дека САД ќе ја „завршат работата“ во Иран штом ќе бидат „блиску до постигнување на клучните стратешки цели“ и дека тој ќе го врати Иран „во камено доба“.

Трамп не го спомена рокот што му го даде на Иран за отворање на Ормутскиот теснец, витален воден пат за глобални испораки на нафта и гас, откако претходно му се закани на Иран дека САД ќе ја нападнат иранската енергетска инфраструктура ако теснецот не биде повторно отворен. Тој не кажа како да се стави крај на прекинот во снабдувањето што ги доведе цените на енергијата до пораст.

- Advertisement -

Цените на нафтата денес нагло скокнаа по забелешките на Трамп. Меѓународната референтна сурова нафта Брент порасна за 6,9 проценти на 108,15 долари за барел, додека американската референтна сурова нафта порасна за 6,4 проценти на 106,55 долари за барел.

„Пазарите покажаа разочарување бидејќи говорот на претседателот Трамп беше далеку под очекувањата на пазарите. Немаше конкретни детали за прекин на непријателствата со Иран, а пазарот сака јасна перспектива за прекин на огнот“, рече Такаши Хироки, главен стратег во Monex во Токио. Азиските акции исто така паднаа, при што индексот Никеи во Токио се намали за 2,4 проценти во понеделник, а јужнокорејскиот Коспи изгуби 4,5 проценти откако владините податоци покажаа дека потрошувачките цени се зголемиле за 2,2 проценти во март во споредба со претходната година поради зголемувањето на цените на горивата.

Ханг Сенг во Хонг Конг падна за 1,3 проценти, а Шангајскиот композитниот индекс се намали за 0,9 проценти. Австралискиот S&P/ASX изгуби 1,1 процент, тајванскиот Taiex падна за 1,8 проценти, а индискиот Sensex падна за 1,9 проценти.

Фјучерсите во САД изгубија повеќе од 1,2 проценти.

Цените на златото и среброто исто така паднаа. Златото падна за 4 проценти на 4.621 долари за унца, а среброто за 7,3 проценти на 70,53 долари за унца.

Цените на нафтата повторно пораснаа, а берзите денес паднаа по вчерашниот обновен оптимизам за можен брз крај на војната во Иран по изјавите на Трамп во вторникот дека американската војска би можела да ја заврши својата офанзива за две до три недели.