Силен земјотрес со јачина од 4,9 степени според Рихтеровата скала е почувствуван на Света Гора, малку по 9 часот синоќа

Силен земјотрес со јачина од 4,9 степени според Рихтеровата скала е почувствуван на Света Гора, малку по 9 часот синоќа. Земјотресот бил почувствствуван и во Софија и во делови од Македонија.

Според грчките медиуми, епицентарот на земјотресот бил лоциран на 8 километри северозападно од Кареја на Света Гора, додека длабочината на жариштето била на 5 километри.

Според информациите, земјотресот бил почувствуван во Солун, а потоа следеле уште три последователни потреси, од кои најсилниот бил со јачина од 3,3 степени според Рихтер.

- Advertisement -

Според информациите на Вориа, во Кареја се појавиле бројни пукнатини на старите згради.

Во моментот на земјотресот во храмот се служела служба, а светогорските монаси и поклоници во страв излегле надвор.

– Беше прилично силен земјотрес и почувствувавме дека потресот доаѓа одоздола нагоре. Траеше и нè исплаши. Лустерите се нишаа ваму-таму, а некои ситни предмети паднаа. Потоа следеа земјотреси со пократко траење и послаб интензитет. Генерално, владее вознемиреност – изјавиле монасите за Вориа.

Штети пријавуваат монаси во старите скитови и келии, додека поклониците велат дека земјотресот траел долго и дека на крајбрежните места бил проследен со татнеж. За јачината на татнежот сведочи и видео кое го објави Вориа, снимено со безбедносна камера близина на манастирот Есфигмен.