УДАР ЗА КИОСЦИТЕ И ТОБАКО ПРОДАВНИЦИТЕ Законот може да избрише 4.000 бизниси

Малите трговци алармираат дека новиот закон за заштита од пушењето може сериозно да ги загрози нивните бизниси, откако нивните забелешки не биле вклучени во најновата верзија на предлог-решението.

Сопствениците на тобако продавници, киосци и мини маркети реагираат дека и покрај нивните предупредувања уште од првичната верзија, клучните одредби останале непроменети. Тие стравуваат од финансиски загуби, отпуштања и затворање на дел од малопродажните објекти.

Иако од Министерството за здравство тврдат дека се консултирале со засегнатите страни, трговците велат дека нивните аргументи не се вградени во текстот. Единствената измена, според нив, е шестмесечниот рок за прилагодување, кој наместо олеснување – носи нови трошоци.

- Advertisement -

Според податоци од бизнис-заедницата, повеќе од 4.000 мали и средни компании во земјава, најчесто семејни бизниси, директно зависат од продажбата на тутунски и сродни производи. За голем дел од нив, токму овие производи се клучен извор на приход, особено поради долгорочните договори со добавувачите.

Контроверзните мерки остануваат непроменети – тутунските производи да не бидат видливи за купувачите и да се чуваат во затворени, непрозирни шкафови. Дополнително, се задржуваат и строгите ограничувања за комуникација и означување поврзано со овие производи во самите продажни објекти.

Трговците предупредуваат дека ваквите правила директно ги погодуваат, особено затоа што во изминатите години вложувале во уредување на продавниците и брендирање согласно претходните прописи. Со новите измени, тие инвестиции практично ја губат вредноста, а потребни се нови вложувања.

Во вакви услови, малите продажни објекти се соочуваат со сериозна неизвесност. Наместо прилагодување на законските решенија врз основа на реакциите од терен, предложените измени, според нив, ги оставаат илјадници семејни бизниси пред ризик од затворање и губење на егзистенцијата.