Соединетите Американски Држави почнаа да ги користат британските воени бази за одредени операции против Иран

Топ Вести - Слушај сега

Соединетите Американски Држави почнаа да ги користат британските воени бази за одредени операции против Иран, соопшти денеска Владата во Лондон. Британското Министерство за одбрана прецизираше дека американските сили ги користат локациите за „одбранбени операции за да го спречат Иран во истрелувањето проектили во регионот“.

- Advertisement -

Британскиот премиер Кир Стармер првично одбиваше каква било вклученост во војната што започна на 28 февруари, што предизвика лутина кај американскиот претседател Доналд Трамп. Сепак, Стармер подоцна се согласи со барањето на Вашингтон за користење на две бази – во Ферфорд, Глостершир, и заедничката база Диего Гарсија во Индискиот Океан.

Во базата во Ферфорд денеска веќе слета американски бомбардер Б-1 Лансер (B-1 Lancer), додека пред влезот на објектот се собраа антивоени демонстранти.

Трамп рече дека „не е задоволен од Велика Британија“ и му се потсмеваше на Стармер, велејќи дека „не разговараат со Винстон Черчил“.

Стармер, поранешен адвокат за човекови права, ја бранеше својата првична одлука, велејќи дека Велика Британија „секогаш мора да има правна основа и одржлив, добро осмислен план“.

Тој, исто така, инсистираше дека бил во право што го променил својот став бидејќи одмаздата на Иран со беспилотни летала и ракети за нападите на САД и Израел ги загрози британските интереси и сојузници во регионот.

Пратениците во владејачката Лабуристичка партија на Стармер сè уште се прогонувани од катастрофалната поддршка на поранешниот премиер Тони Блер за американската инвазија на Ирак во 2003 година.

Анкета на 1.045 Британци објавена вчера покажа дека 56 проценти од испитаниците сметаат дека Стармер бил во право што не ја вклучил Велика Британија во првичните напади. Само 27 проценти рекле дека греши.