КРИЗАТА НА БЛИСКИОТ ИСТОК Е ГОЛЕМ ПРЕДИЗВИК ЗА МАКЕДОНСКАТА ЕКОНОМИЈА

Топ Вести - Слушај сега

Рано е да се прогнозира колку ќе трае ситуацијата на Блискиот Исток, треба да почекаме, да видиме. Состојбата се следи на дневна основа, а ако се утврди дека е потребно да преземеме мерки од аспект на економијата, тие ќе бидат согласно законот, рече денеска министерката за финансии Гордана Димитриеска-Кочоска.

- Advertisement -

Според министерката, македонската економија е под силно влијание на случувањата однадвор и тоа е голем предизвик, но како што Владата покажа изминатите 20 месеци дека знае да се справува, така ќе продолжи да креира мерки и политики од интерес на стопанството и граѓаните.

–  Не можеме да знаеме колкав ќе биде периодот до завршување на ситуацијата на Блискиот Исток, некои велат ќе трае кратко, некои анализи покажуваат дека подолго ќе трае. Треба да почекаме и да видиме, не би сакала однапред да зборувам. Ако ваквата ситуација продолжи, тогаш со ребалансот ќе ги менуваме проекциите. Секако на Владата ќе и стојат и други мерки на располагање, но ќе видиме. Владата е таа што треба да одлучи, премногу е рано особено за ситуација која очекуваме да заврши во пократок период, да прогнозираме дека нешто страшно ќе се случи. Ги следиме состојбите, да оставиме, да видоме како ќе се развиваат работите- вели Димитриеска-Кочоска.

Таа потсети дека Министерството за финансии не предлага кризни состојби, но вели, ако биде потребно владата ќе донесе и таква одлука.

– Има соодветни министерства кои, врз основа на анализи, треба да достават таков предлог и откако ќе се констатира каква е состојбата, во законот јасно стои што треба да се преземе. Ние ги следиме состојбите на дневна основа. Ќе видиме какви ќе бидат случувањата. Во законите е предвидено во кои услови може да има промени. Соодветно ќе реагираме. Нема песимистичко сценарио, законот е јасен. Има членови што кажуваат кога, во кои услови може да се направат промени – објаснува Димитриеска Кочоска.