Техеран две децении ги проучува американските воени операцииТехеран две децении ги проучува американските воени операции

Топ Вести - Слушај сега

САД и Израел почнаа војна против Иран, ама Иран ќе одлучи како и кога ќе заврши војната, рече денеска шефот на иранската дипломатија, Абас Арагчи.

- Advertisement -

„Имавме две децении да ги проучуваме поразите на американската војска на нашиот непосреден исток и запад. Според тоа, извлековме лекции“, објави Арагчи на платформата Икс, осврнувајќи се на американските воени инвазии на Ирак и на Авганистан на почетокот на 2000-тите.

Арагчи истакна дека бомбардирањето на Техеран „нема никаков ефект“ врз способноста на Иран да води војна.

„Децентрализираната мозаична одбрана ни овозможува да одлучиме кога и како ќе заврши војната“, нагласи иранскиот министер за надворешни работи.

САД и Израел на 29 февруари го нападнаа Иран во одделни, но координирани операции, „Епски бес“ и „Лавот што рика“, откако во дипломатските разговори во Женева не се успеа да се постигне договор за иранската нуклеарна програма. Во преговорите САД побараа Иран да престане со збогатување на ураниум, што потенцијално би можело да доведе до тоа оваа земја да се стекне со нуклеарна бомба.

Како одговор на нападот, Иран ја започна одмазничката операција „Вистинско ветување 4“, во која беа лансирани најмалку 10 бранови ракети и беспилотни летала врз Израел и врз американските бази и други цели во повеќе држави на Блискиот Исток, за кои Иран вели дека се поврзани со американските напади.

Корпусот на исламската револуционерна гарда (ИРГК) на Иран денеска објави дека во десеттиот бран напади врз Израел е извршен ракетен напад врз израелскиот владин комплекс во Тел Авив, врз безбедносните и воените центри во Хаифа, како и врз Источен Ерусалим.

Во соопштението објавено од агенцијата „Тасним“ се наведува дека балистичките ракети „хајбер“ биле употребени во десеттиот бран напади.

„Десеттиот бран од операцијата отвори огромна противпожарна врата кон окупираните територии со ракетниот маневар „хајбер“. Целните напади врз израелскиот владин кампус во Тел Авив, нападите врз воените и безбедносните центри во Хаифа и нападите врз Источен Ерусалим беа некои од целите на десеттиот бран. Претходно, предупредивме за проширување на планот за напад врз базите и окупираните територии на непријателите агресори и објавивме дека сирените во Израел никогаш нема да престанат“, се наведува во соопштението на ИРГК.

ИРГК ги советува жителите на Израел „да се држат подалеку од воените бази, безбедносните и владините центри и веднаш да ги напуштат окупираните територии“.