Владата формира единствен центар за срцеви болести

Топ Вести - Слушај сега

Владата одлучи да ги спои Клиниката за кардиологија и Државната клиника за кардиохирургија, со цел пациентите со срцеви заболувања да добијат поефикасен и покоординиран третман, информира Министерството за здравство на Северна Македонија.

- Advertisement -

Одлуката, како што посочуваат од Министерството, била донесена на последната владина седница одржана минатиот вторник, на нивен предлог. Со спојувањето треба подобро да се искористат човечките, просторните и технолошките ресурси на двете установи.

Министерот за здравство Азир Алиу вели дека со ова се формира единствен терциерен центар за кардиоваскуларна медицина.

— Со донесената одлука за спојување на двете клиники формираме единствен центар на терциерно ниво за кардиоваскуларна медицина, кој овозможува континуитет на дијагностичко-терапевтскиот процес — од превенција и дијагностика до интервентен и хируршки третман. Преку укинување на административните дупликати и оптимизација на организациската структура, создаваме предуслови за заштеда на средства кои ќе се реинвестираат во унапредување на квалитетот на услугите, модернизација на медицинската опрема и професионална едукација на кадарот — појасни Алиу.

Според Министерството, со интеграцијата ќе се зголеми искористеноста на капацитетите и бројот на интервенции, преку поврзување на лабораториските, стерилизациските и операционите служби.

Пациентите, како што се наведува, ќе добиваат комплетна кардиолошка и кардиохируршка грижа во рамки на една установа, без административни пречки и чекање трансфер, што треба да значи поголема достапност и континуитет на услугите.

Од Министерството додаваат дека спојувањето ќе има ефект и врз образованието и науката, преку создавање обединет академски центар со повеќе можности за обука на специјализанти и супспецијализанти, како и за развој на научни програми.