Првично запленетите 40 тони марихуана ќе се чуваат во МВР како доказ

Топ Вести - Слушај сега

Министерството за внатрешни работи ги објави првите снимки од досега запленетите 40 тони марихуана во големата полициска акција. Министерот Панче Тошковски заедно со премиерот Христијан Мицкоски, тимот од МВР и директорот на Бирото за јавна безбедност испратија јасна порака дека криминалот ќе биде обелоденет и дека истрагата продолжува.

- Advertisement -

– Денеска заедно со претседателот на Владата, директорот на Бирото за јавна безбедност и тимот од МВР имаме можност да ги видиме првите 40 тони марихуана запленети во првичната фаза од големата полициска истрага. Според комисијата за здравство марихуаната е произведена и чувана надвор од законските протоколи. Истата привремено ја складиравме во простории на МВР со цел за понатаму да биде искористена како дел од доказната постапка. Продолжуваме со активности заедно со обвинителството за организиран криминал ОЈО ГОКК и со останатите обвинителства за истрагата за да можеме докрај да го расветлиме случајот. За жал, негрижата и катастрофалниот однос во овој и во повеќе сектори предизвикале екстремно штетни последици. Во соработка со сите надлежи инстицуии, комисии и инспекции сметам дека во наредниот период ќе делуваме соодветно за да можеме да ја отстраниме незаконито произведената дрога чија крајна цел биле или македонските или европските улици – изјави првиот човек на МВР Панче Тошковски.

Премиерот Мицкоски испрати порака до криминалците дека жестоко ќе бидат казнети и дека криминалот бил исплатлива работа во некои други минати времиња.

– Почитувана македонска јавност, она што го гледате зад мене е дел од оние 40 тони цвет од канабис, нешто кое претставува резултат на погрешни политики од едно друго време. Очекуваме на денешната седница на влада се донесе одлука за формирање комисија која ќе влезе во повеќе правни лица и ќе испита кои правни субјекти го изиграле законот. Со сето ова кое се случуваше изминатите денови имавме цел да покажеме дека никој не е над законот, дека нема компромис со корупцијата, дека МВР со сите капацитети ќе се справи со случајот. Сакам да испратам порака до сите кои мислеле дека криминалот е исплатлива работа, денеска криминалот не се исплати. Ќе бидете пронајдени и ќе бидете жестоко казнети сите вие кои мислите дека ова се исплати – изјави премиерот.