Дали блокадата ја покажува силата на синдикатите?

Топ Вести - Слушај сега

Блокадата на македонското Собрание од страна на Сојузот на синдикатите за минимална плата од 600 евра и зголемување на сите плати за 100 евра почна во 9 часот. Блокирани се влезовите на Собранието и улицата пред Собранието, а на блокадите се појавија околу 50 луѓе, со што се потврди вчерашната изјава на претседателот на ССМ Слободан Трендафилов дека за блокада треба да го обезбедат законскиот минимум на учество на луѓе

- Advertisement -

– Согласно закон, најмалку по 21 човек се потребни на двете локации за да ги блокираме пратениците, но ве покануваме сите што можете да ни се придружите – рече вчера Трендафилов.

Тој рече и дека за една година секое семејство е посиромашно за 9.500 денари месечно затоа што вредноста на синдикалната минимална кошница е зголемена за толку пари.

– Пратениците се уште се прават глуви на иницијативата на ССМ за зголемување на минималната плата и на останатите плати за 100 евра, како и за последната иницијатива на ССМ за намалување на нивните плати за 80%, односно да си ја намалат основицата за пресметка на плата од просечна на минимална плата и да ги намалат нивните коефициенти на сложеност – рече вчера Трендафилов.

ССМ ги обвинува пратениците дека го блокираат законот за зголемување на минималната плата повеќе од една година и дека не сакаат да ја прифатат нивната иницијатива за намалување на функционерските плати.

Сепак, бројноста на денешната блокада го отвора прашањето за размерите на поддршката што ја имаат овие барања на синдикатот.