Документарниот филм „Меланија“, посветен на поранешната прва дама на САД, Меланија Трамп, стартуваше со исклучително слаба посетеност во кината во Обединетото Кралство

Топ Вести - Слушај сега

Документарниот филм „Меланија“, посветен на поранешната прва дама на САД, Меланија Трамп, стартуваше со исклучително слаба посетеност во кината во Обединетото Кралство. Според податоци од киносалите, на дел од премиерните проекции бил продаден само по еден билет, а во некои термини салите останале речиси целосно празни, што веднаш отвори прашања за реалниот интерес кај европската публика.

- Advertisement -

Слична слика се наѕира и во САД, каде што филмот се прикажува во голем број кина, но со скромна предвремена продажба. Иако документарецот има широка дистрибуција и силна медиумска поддршка, интересот на публиката, особено во големите урбани центри, засега останува под очекувањата.

Слабите резултати на благајните брзо станаа тема на социјалните мрежи, каде што корисниците иронично коментираат дека станува збор за „најтивката премиера на годината“. Дел од коментарите го опишуваат филмот како проект без јасна публика, додека други го нарекуваат „ванити-документарец“ со ограничени симпатии надвор од тесен политички круг.

Дополнително масло на огнот долеаја и американските телевизиски комичари, кои во своите емисии отворено се потсмеваа со слабата продажба на билети. Во сатирични сегменти беше истакнато дека филмот предизвикува повеќе реакции во монолозите отколку во киносалите, а темата често беше користена како симбол за јазот меѓу маркетингот и реалниот интерес.

Финансискиот аспект го прави случајот уште повпечатлив. „Амазон ЕМ-џи-ем стдудиос“ (Amazon MGM Studios), според медиумски извештаи, платил околу 40 милиони долари за правата на документарецот, додека дополнителни приближно 35 милиони долари биле вложени во маркетинг и промоција, што ја носи вкупната инвестиција на повеќе од 75 милиони долари.

Со оглед на моменталните резултати, аналитичарите проценуваат дека филмот тешко ќе успее значително да ја врати вложената сума преку кино-прикажувањето. Проекциите за заработка во првите недели се далеку под нивото што би било потребно за финансиска рамнотежа, дури и со оптимистички сценарија.

Надежите на продуцентите сега се насочени кон стриминг-дистрибуцијата и меѓународните пазари, каде што филмот би можел да привлече поширока публика преку политичкиот контекст и ексклузивниот пристап до приватниот живот на Меланија Трамп.

Иако Меланија Трамп е наведена како извршна продуцентка и активно учествувала во создавањето на филмот, засега нема нејзини реакции за приемот кај публиката или за финансиските очекувања. Таа досега се ограничи на пораки дека документарецот е „личен проект“ и „автентичен приказ“ на нејзината приказна.