Мелони со остар одговор на критиките на Трамп

Топ Вести - Слушај сега

Италијанската премиерка Џорџа Мелони, близок сојузник на Доналд Трамп, вчера ја изрази својата „запрепастеност“ и побара „почитување“ од американскиот претседател по неговите изјави со кои ја омаловажи улогата на сојузничките сили на НАТО во Авганистан.

- Advertisement -

– Италијанската влада со запрепастеност дозна за изјавите на претседателот Трамп дека сојузниците во НАТО биле ‘оставени позади’ за време на операциите во Авганистан – рече Мелони во официјално соопштение.

Таа нагласи дека Италија и Соединетите Американски Држави ги поврзува силно пријателство, кое, како што рече, е уште понеопходно во време на бројни глобални предизвици.

– Но, пријателството бара почит – фундаментален услов за продолжување на солидарноста што е темел на Атлантската алијанса – додаде Мелони.

Во интервју за „Фокс њуз“ во четвртокот, Трамп ја критикуваше улогата на другите земји-членки на НАТО за време на 20-годишниот конфликт во Авганистан, тврдејќи дека тие „останале настрана од линијата на фронтот“ и дека на САД „никогаш не им биле потребни“.

Мелони потсети дека по терористичките напади на 11 септември 2001 година, НАТО за прв и единствен пат во својата историја го активираше Членот 5 – чин на вонредна солидарност со САД.

– Италија веднаш застана рамо до рамо со своите сојузници, распоредувајќи илјадници војници и преземајќи целосна одговорност за Западната регионална команда, една од најважните оперативни области на меѓународната мисија – истакна таа.

Премиерката ја нагласи и високата цена што ја плати Италија за време на мисијата.

– 53 италијански војници ги загубија животите, а повеќе од 700 беа ранети во борбени операции, безбедносни мисии и програми за обука на авганистанските сили  Затоа, изјавите што го минимизираат придонесот на земјите од НАТО во Авганистан се неприфатливи, особено кога доаѓаат од земја-сојузник – заклучи Мелони.

Претходно истиот ден, на изјавите на Трамп реагираа и шефот на италијанската дипломатија Антонио Тајани и министерот за одбрана Гвидо Кросето.

– Во однос на посветеноста на Италија, учеството на нејзините вооружени сили, нивните вредности и жртви, не можеме и нема да прифатиме површни и погрешни анализи. Од никого – напиша Кросето на социјалната мрежа „X“.