Зголемен број на напади од ајкули во Сиднеј

Топ Вести - Слушај сега

Зголемувањето на нападите од ајкули во Сиднеј, најголемиот град во Австралија, пријавени во пошироката метрополитенска област, веројатно се должи на зголемувањето на температурите на океанот и обилните врнежи од дожд, објавија австралиските медиуми, повикувајќи се на податоци од полицијата на Нов Јужен Велс.

- Advertisement -

Полицијата на Нов Јужен Велс потврди дека во Сиднеј во последните два дена се регистрирани два напади од ајкули врз луѓе, објави австралискиот јавен радиодифузер SBS.

Дванаесетгодишно момче беше хоспитализирано во недела откако беше нападнато од ајкула покрај брегот на источен Сиднеј, а 24 часа подоцна 11-годишно момче беше нападнато од ајкула на плажата Ди Вај во северен Сиднеј.

„Комбинацијата од сол и свежа вода донесена од неодамнешните врнежи од дожд создаде бурна средина погодна за активност на ајкулите“, рече шефот на полицијата на Нов Јужен Велс, Џозеф Мекналти.

Сиднејскиот „Морнинг Хералд“ објави дека до средината на јануари 2026 година, температурите на водата околу Сиднеј се искачиле над 22 степени Целзиусови, создавајќи идеални услови за ајкулите и забавувајќи ја нивната сезонска миграција кон север.

„Ова затоплување предизвикува барем еден од трите главни видови ајкули кои се потенцијално опасни за луѓето да поминуваат повеќе време во пристаништето во Сиднеј“, рече истражувачот од Универзитетот Џејмс Кук, Николас Лубиц, додавајќи дека големите бели ајкули, биковите ајкули и тигрестите ајкули се сметаат за најопасни за луѓето.

Државната администрација објави дека во регионот се спроведува посебна програма за контрола на ајкули за да се обезбеди јавна безбедност, вклучувајќи надзор со дронови, систем за предупредување од ајкули и подводни станици за аудио мониторинг способни звучно да го детектираат движењето на предаторите во радиус од 500 метри од популарните градски плажи.

Во пристаништето во Сиднеј имаше два напада на ајкули во 2025 година, првиот во септември кога 57-годишниот сурфер Меркјури Псилакис почина откако беше нападнат од ајкула на плажата Лонг Риф во северен Сиднеј.

Во декември 2025 година, 25-годишната швајцарска државјанка Оливија Милхајм почина откако беше нападната од голема бела ајкула на плажа во близина на центарот на Сиднеј.

Вкупно 18 напади на ајкули беа пријавени во Австралија во 2025 година, од кои четири беа фатални.