Зеленски ја потврди информацијата дека украински, американски и европски претставници ќе одржат серија состаноци во Берлин во наредните денови, додавајќи дека лично ќе се сретне со пратениците на претседателот на САД, Доналд Трамп

Украинскиот претседател Володимир Зеленски ја потврди информацијата дека украински, американски и европски претставници ќе одржат серија состаноци во Берлин во наредните денови, додавајќи дека лично ќе се сретне со пратениците на претседателот на САД, Доналд Трамп.

– Ќе се сретнам со пратениците на претседателот Трамп, ќе има и состаноци со нашите европски партнери, со многу лидери, во врска со основите на мирот – политички договор за крај на војната – изјави Зеленски во полноќното обраќање до нацијата.

Специјалниот пратеник на американскиот претседател Стив Виткоф, и зетот на Трамп, Џаред Кушнер, патуваат за Берлин за разговорите, изјави претставник на Белата куќа, кој сакал да остане неименуван, пренесува ДПА.

- Advertisement -

– Актуелната можност е значајна и тоа е важно за секој град, за секоја украинска заедница. Работиме да обезбедиме мирот за Украина да биде достоен, и да обезбедиме гаранција, пред сѐ гаранција дека Русија нема да се врати во Украина за трета инвазија – рече Зеленски.

Финскиот претседател Александер Стуб го откажа планираното патување во САД за понеделник и вторник, за да може да отпатува за Германија за разговорите за Украина, објави Укринформ, повикувајќи се на финското радио и телевизија Јуле.

Како што во петокот соопшти портпарол на германската Влада, меѓу европските лидери кои ќе се состанат во Берлин се францускиот претседател Емануел Макрон, британскиот премиер Кир Стармер и „многу други“.

Стуб требаше да го посети Тексас заради презентацијата на новите борбени авиони Ф-35 за Финска и за отворањето на фински конзулат во Хјустон.

Засега точниот распоред на средбите во Берлин не е познат. Посетата на Виткоф и Кушнер, според извештаите, се очекува „за време на викендот“, а средбата на европските лидери е најавена за утре.