Новообјавени фотографии и снимки од островот на Џефри Епштајн, го откриваат затворениот свет на Карибите каде што, според обвиненијата, тој вршел трговија и сексуално злоставување на малолетни лица

Новообјавени фотографии и снимки од островот на Џефри Епштајн, го откриваат затворениот свет на Карибите каде што, според обвиненијата, тој вршел трговија и сексуално злоставување на малолетни лица, јави „Гардијан“.

Снимките, направени во 2020 година од властите на Американските Девствени Острови и објавени дури сега од страна на Одборот за надзор во американскиот Конгрес, ја прикажуваат внатрешноста на имотот.

На снимките можат да се видат луксузни спални соби, бањи, библиотека-канцеларија, кујна, па дури и ходници со телефон за брзо бирање.

- Advertisement -

Во една од просториите се гледа забарски стол, опколен со латекс маски од машки лица што висат на ѕидовите, морничава сцена која потсетува на шпионски трилер, а не на дом за одмор.

На ѕид во друга просторија стои табла со зборови како „моќ“, „измама“, „ум“, „музика“ — зборови што одекнуваат како симболи на манипулација и злоупотреба и што го ставаат целото место во нов, уште помрачен контекст.

Законодавците од Одборот во Конгресот истакнале дека објавувањето на овие материјали има за цел јавна транспарентност. Со други зборови, да се покаже каков простор и атмосфера имал Епштајн, со надеж дека тоа ќе помогне во обединување на доказите и правдата за жртвите во случајот.

Сепак, ниту една од фотографиите или видеата не прикажува присуство на жртви или други лица.

Одборот во американскиот Конгрес најави дека во наредните денови ќе објави и дополнителни документи,  меѓу нив и банкарски записи од „Џеј-Пи Морган“ и „Дојче банка“, со цел целосно да се состави мапа на тоа како кружеле парите околу Епштајн.

Покрај тоа, рокот што го налага новиот закон, „Законот за транспарентност на досиејата на Епштајн“, ќе создаде дополнителен притисок за објавување на сите досега неоткриени материјали, пред 19 декември, за да се овозможи јавна расправа и вистинска одговорност.

Во 2022 година, главниот обвинител на Американските Девствени Острови постигна спогодба за повеќе од 100 милиони долари со имотот на Епштајн, откако тие тврдеа дека „десетици млади жени и деца биле жртви на трговија со луѓе, силувани, сексуално нападнати и држени како заробеници на Девствените Острови на осамениот приватен остров на Епштајн, Литл Сент Џејмс“.