Националното биро за борба против корупцијата во Украина го истражува Андриј Јермак, началникот на кабинетот на претседателот Володимир Зеленски. Тој е еден од неговите клучни сојузници, а Зеленски неодамна му ја довери задачата да ги води преговорите со американската делегација за обновување на американскиот план за прекин на војната во Украина.
Националното биро за борба против корупцијата (NABU) денес објави дека, заедно со Специјализираното обвинителство за борба против корупцијата (SAP), го истражува началникот на кабинетот на украинскиот претседател Андриј Јермак, објавува француската новинска агенција AFP. Сè уште не даде дополнителни детали.
Јермак потврди на социјалните медиуми дека NABU и SAP спроведуваат истраги во неговиот дом и дека тој целосно соработува со нив, објавува британската BBC.
„Истражителите немаат пречки. Тие имаат неограничен пристап до станот, а моите адвокати се присутни на лице место и соработуваат со полицијата“, додаде тој.
Јермак се смета за клучен сојузник на украинскиот претседател Володимир Зеленски. Тој неодамна го задолжи да ги води преговорите со американската делегација за обновување на американскиот план за прекин на војната во Украина.
Јермак со американскиот државен секретар Марко Рубио на прес-конференција по мировните преговори во Женева
Едно од највисоките нивоа на корупција во Европа
Украина е честа цел на финансиски и корупциски скандали. И покрај зајакнувањето на антикорупциските тела основани откако прозападните политички сили дојдоа на власт во 2014 година, Украина е земја со едно од највисоките нивоа на корупција во Европа, според Транспаренси Интернешнл.
Најновиот корупциски скандал ја зафати Украина пред две недели, кога антикорупциските власти започнаа истраги за неколку лица осомничени за вмешаност во скандал со поткуп од 100 милиони долари во енергетскиот сектор.
Како одговор на тоа, Министерството за внатрешни работи на Украина издаде налози за апсење на долгогодишниот партнер на Зеленски, Тимур Миндич, и финансиерот Олександр Цукерман. Во налозите се наведува дека двајцата избегале во странство. Скандалот доведе и до оставки на министерот за правда Герман Галушченко и министерката за енергетика Свитлана Гринчук.
