Двајца припадници на американската Национална гарда се во критична состојба откако вчера беа застрелани близу Белата куќа во Вашингтон

Двајца припадници на американската Национална гарда се во критична состојба откако вчера беа застрелани близу Белата куќа во Вашингтон. Полицијата кажа дека пукал еден напаѓач, кој потоа бил совладан од други членови на Националната гарда.

Министерството за внатрешна безбедност го идентификуваше напаѓачот како Рахманулах Лакамал, опишувајќи го како криминалец од Авганистан. Неговиот имигрантски статус не е познат.

Застреланите гардисти биле во патрола две улици подалеку од Белата куќа кога биле застрелани, соопшти директорот на ФБИ, Каш Пател, додавајќи дека биле начекани во заседа. Властите рекоа дека напаѓачот бил застрелан четирипати од други гардисти кои биле во близина и дека не соработувал со истражителите.

- Advertisement -

Американскиот претседател Доналд Трамп, кој во тој момент бил во Флорида, го нарече пукањето терористички напад. Тој рече дека напаѓачот е авганистански државјанин кој влегол во САД во септември 2021. Набргу потоа, САД ја суспендираа обработката на сите барања за имиграција на авганистанските државјани.

Десетици илјади Авганистанци влегоа во САД според специјална имигрантска заштита по хаотичното повлекување на Американците од земјата во 2021.

– Сега мора повторно да ги испитаме сите странци кои влегле во нашата земја од Авганистан во времето на Џо Бајден. Животното што ги застрела двајцата припадници на Националната гарда ќе плати многу висока цена – изјави Трамп и нареди распоредување на уште 500 гардисти во Вашингтон.

Нападот се случил околу 14:15 часот, во близина на метро-станицата Farragut West, само неколку блокови од Белата куќа. Според полицијата, напаѓачот се појавил зад аголот, подигнал оружје и од заседа пукал кон припадниците на гардата.
Командантот Џефри Керол од полицијата во Вашингтон изјави дека други припадници на гардата веднаш реагирале.

– Ги слушнале пукотниците, го совладале осомничениот и го држеле на земја откако бил погоден – рече шефот на полицијата.
Припадниците на Националната гарда се во тешка здравствена состојба и се борат за живот, а и напаѓачот е ранет и хоспитализиран во критична состојба.
Белата куќа накратко беше блокирана како мерка на претпазливост, но мерката беше укината околу 17 часот, вечерта по американскоо време.