ВАСИЛЕВСКА МУ ЗАБЛАГОДАРИ НА ВАЈЦ ШТО СЕ ЗАЛОЖУВА ЗА МАКЕДОНИЈА

Копретседавачката на Мешовитиот парламентарен комитет РСМ – ЕУ, Иванка Василевска, денеска во Стразбур му изрази благодарност на известителот за Македонија во Европскиот парламент, Томас Вајц, за неговиот континуиран ангажман во поддршката на евроинтеграциите на земјата.

Василевска и заменик-копретседавачката Соња Мираковска се сретнале со Вајц пред почетокот на 24. состанок на Мешовитиот комитет во Европскиот парламент. Разговорите, според собраниската прес-служба, се одвивале во дух на меѓусебна почит и европска солидарност.

„Благодарни сме за напорите на Европскиот парламент и особено за Вашиот личен ангажман во придвижувањето на процесот на приближување кон Европската Унија“, истакна Василевска, додавајќи дека сите релевантни политички фактори во државата се посветени на оваа стратешка цел.

- Advertisement -

Томас Вајц, пак, ја потврдил силната поддршка на Европскиот парламент за интеграцијата на Македонија, нагласувајќи дека процесот ќе се темели врз резултати и искрена соработка.

Меѓу темите на разговор биле актуелните случувања во земјата, реформската агенда и Извештајот на Европската комисија. Василевска ја нагласила потребата да се зачува конструктивниот политички дијалог, како клучен елемент за напредокот на земјата во преговорите со Унијата.