Расчистено свирепо убиство во Штип

Во Штип е расчистено свирепо убиство што ја потресе јавноста – 74-годишниот Д.А. од Штип се соочува со кривична пријава за убиство и противправно лишување од слобода.

Според истрагата на СВР Штип и Одделот за криминалистичка полиција, тој ја држел 79-годишната Б.Н. против нејзина волја во својот дом, а потоа ја усмртил со остар предмет и го закопал нејзиното тело во дворот.
Случајот почнал да се одмотува на 24 октомври, кога сестрата на исчезнатата, 84-годишната Д.О., пријавила дека Б.Н. исчезнала од својот дом. Полицијата дошла до сомнеж дека таа можеби е со сила затворена кај Д.А., по што на 10 ноември, со судска наредба, бил извршен претрес во неговиот дом. Тогаш биле пронајдени повеќе траги од крв и предмети важни за истрагата. Д.А. бил приведен и задржан во притвор 96 часа, во Затворот Куманово.
Подоцна, по добиените форензички резултати, полицијата повторно разговарала со осомничениот. Во исказот тој детално опишал како го извршил убиството. Истражителите го пронашле телото, а по наредба на јавен обвинител е предадено на обдукција.
Д.А. е изведен пред судија на претходна постапка и му е одреден 30-дневен притвор.