Лукашенко се закани дека ќе заплени 1.200 литвански камиони

Белорускиот претседател Александар Лукашенко се закани дека ќе заплени околу 1.200 литвански камиони задржани во Белорусија по затворањето на литванската граница поради упади на шверцерски балони кои пренесувале шверцувани цигари.

Литванија, која е членка на НАТО и Европската Унија, на 29 октомври затвори два гранични премини со Белорусија откако шверцерски балони што летале од Белорусија предизвикале нарушување на воздушниот сообраќај на аеродромот во главниот град Вилнус, пренесува Еуроњуз.

Литванските власти тврдат дека нарушувањата на летовите се дел од антизападни активности на Белорусија, која е сојузник на Русија, дека имаат за цел да ја поткопаат стабилноста, и соопштија дека границата ќе остане затворена најмалку до крајот на ноември.

- Advertisement -

Лукашенко го осуди затворањето на границата и оцени дека тоа е „измама и дел од хибриден напад“ против Белорусија, порачувајќи дека Литванија сама треба да се справи со шверцот.

Белоруските власти одбиле да отворат коридор исклучиво за евакуација на блокираните литвански камиони, барајќи Литванија повторно целосно да ја отвори границата.

– Ако Литванија не ја отвори границата во наредните неколку дена, ќе донесеме одлука во согласност со нашиот закон и можеби ќе ги конфискуваме возилата, рече Лукашенко.