Русија почна сериско производство на балистичката ракета со среден дострел Орешник, објави рускиот претседател Владимир Путин. Оваа објава доаѓа речиси една година откако Путин вети масовно производство на ова оружје „во блиска иднина“, во декември 2024 година.
Зборувајќи на церемонијата на доделување награди на развивачите на руската ракета Буревесник и на подводниот дрон Посејдон, Путин ја пофали состојбата на руската одбранбена технологија и потврди дека сериското производство на Орешник е во тек.
– Го развивме и распоредивме ракетниот систем со среден дострел Орешник, почнавме сериско производство. Ги опремивме нашите интерконтинентални балистички ракети и ракети лансирани од подморница со модерни антибалистички ракетни системи – рече путин.
Русија првпат ја употреби својата експериментална ракета Орешник во напад врз украинскиот град Днепар на 21 ноември минатата година, што, според Путин, беше одмазда за употребата на американски и британски ракети со долг дострел од страна на Украина на руска територија.
Орешник е дизајниран да носи нуклеарно оружје, иако Путин потврди дека во нападот врз Днепар не била употребена нуклеарна боева глава. Лани Путин рече дека Орешник е нов изум што може да лета 10 пати побрзо од звукот и не може да биде пресретнат од западните системи за воздушна одбрана.
Иако досега се објавени малку детали за ракетата, аналитичарите за одбрана веруваат дека Орешник“е надградена верзија на рускиот систем РС-26 Рубез, првпат развиен во 2011 година.
Путин, исто така, се пофали со можностите на другите таканаречени супероружја на Русија, вклучувајќи ги системите Буревеник, Посејдон, Авангард и Сармат. Тој тврди дека крстосувачката ракета Буревесник со нуклеарно оружје има „неограничен дострел што ги надминува сите познати ракетни системи во светот“.
Путин, исто така, рече дека за време на неодамнешното тестирање на Буревесник на 21 октомври, Русија „не се мешала“ во извидничкиот брод на НАТО во областа – што, според него, е илустрација за високата точност на таргетирање на оружјето. Тој потврди дека интерконтиненталната балистичка ракета Сармат ќе биде тестирана во борба оваа година и ќе влезе во „борбена должност“ во 2026 година.
– Сите наши планови за создавање напредни системи за оружје, развој на одбранбено-индустрискиот комплекс и за опремување на руската армија и морнарица со модерна опрема и оружје се исполнуваат – рече Путин.
Тој додаде и дека „Русија не е закана за никого“.
