Израел ветува дека ќе го почитува примирјето

Израел денеска соопшти дека ќе се придржува кон спогодбата за прекин на огнот во Појасот Газа, откако синоќешните воздушни напади, според палестинските здравствени власти, однесоа најмалку 104 животи.

И Израел и Хамас меѓусебно се обвинуваат за нарушување на примирјето. Израелската армија (ИДФ) соопшти дека нападите биле одговор на убиството на израелски војник, кој, според нив, бил застрелан од палестински борци.

Во соопштението, армијата потврди дека цел на нападите биле складишта за оружје, тунели и позиции на Хамас, а меѓу ликвидираните се и петмина припадници на групата, меѓу кои и командант кој учествувал во нападите од 7 октомври 2023 година.

- Advertisement -

Палестинското Министерство за здравство во Газа соопшти дека меѓу загинатите има 46 деца и 20 жени, предизвикувајќи ново загриженост меѓу меѓународната заедница за цивилните жртви.

Американскиот претседател Доналд Трамп оцени дека прекинот на огнот не е загрозен. „Израел имаше право да одговори. Ништо нема да го наруши примирјето,“ изјави Трамп додека се враќаше со „Ер форс уан“.

Од друга страна, катарскиот премиер, шеик Мохамед бин Абдуррахман Ал Тани, изрази „длабоко разочарување“ поради новите судири. Тој потсети дека Катар, Египет и САД беа посредници во постигнувањето на договорот за прекин на огнот.

Ал Тани додаде дека Хамас изразил подготвеност да се повлече од управувањето со Газа, нагласувајќи дека Доха постојано ја охрабрува групата да се разоружа.

Според аналитичарите, зачувувањето на примирјето останува клучен предизвик, додека меѓународните посредници продолжуваат да апелираат за мир и заштита на цивилите во регионот.