Во првите 72 часа, со поддршка на Град Скопје и идниот градоначалник Орце Ѓорѓиевски, во една тимска акција, ќе пристапиме кон средување на општината Кисела Вода и Градот Скопје, во насока на справување со предизвиците во делот на чистотата, рече Бети Стаменкоска Трајкоска, кандидат за градоначалник за општина Кисела Вода од редовите на ВМРО-ДПМНЕ, синоќа во дебатната емисија „Локални избори 2025 – изборни соочувања” на МРТ1.
Стаменкоска Трајкоска најави дека во текот на нејзиниот четиригодишен мандат, ќе се продолжи со одржување на континуитетот на реализација на проекти кои се со поддршка на актуелната Влада како и дополнителните проекти кои ќе значат квалитетен живот на граѓаните, а кои се содржани во нејзината програма.
– Станува збор за пешачко велосипедска патека, обиколка на Кисела Вода, организирање и континуитет на процесите во образованието и градинките, средување на училишните дворови, со оплеменување на дополнителна опрема и сето она што значи како иновација во училиштата, а тоа е училници на отворено. Во нашата програма се ставени и сите оние дополнителни проекти кои ќе значат оплеменување и креативност во наставата, но исто така и дополнителна поддршка, а тоа е процесот на климатизација – рече Стаменкоска Трајкоска.
Таа рече дека еден од приоритетите во нејзината програма е и системското уредување и одржување на хигиената, а со цел чиста животна средина.
– Со засилено чистење, миење на улиците и јавните површини, поставување на нови места дополнителни за отстранување на отпад, организирање акции за отстранување на диви депонии, како и со одржливо управување со отпадот, дополнително ќе ги зголемиме можностите за селекција на отпадот. Имаме во нашата програма долгорочни активности кои ќе значат одржување на редот со таканаречени редари кои ќе помогнат во сите тие активности – рече Стаменкоска Трајкоска.
