Германскиот канцелар Фридрих Мерц во телефонски разговор со украинскиот претседател Володимир Зеленски вети дека Берлин ќе го засили притисокот врз Москва и ќе ја прошири соработката со Украина во областа на одбранбената индустрија, јави агенцијата ДПА.
– Канцеларот му вети (на Зеленски) дека Германија ќе ја продолжи својата поддршка и ќе ја прошири соработката во одбранбената индустрија – изјави владиниот портпарол Штефан Корнелиус, додавајќи дека Германија, заедно со своите западни партнери, ќе го засили политичкиот и економскиот притисок врз Кремљ.
Украинскиот претседател Зеленски, преку социјалната мрежа „Икс“ (поранешен Твитер), изрази благодарност за германската поддршка, нагласувајќи дека токму во момент на силни руски напади помошта од сојузниците е клучна.
„Денеска Русија изврши терористички напад врз Украина, таргетирајќи ја нашата енергетска инфраструктура и користејќи стотици дронови и десетици проектили“, напиша Зеленски.
Тој додаде дека Германија дала „значаен придонес за заштитата на украинскиот народ“ и ја нагласи „длабоката благодарност за солидарноста и поддршката“ од Берлин.
