Антивладини демонстранти денеска, на денот кога се одржуваат локални избори во Грузија, упаднаа во дворот на претседателската резиденција во Тбилиси, пробивајќи ги металните огради, а припадници на специјалните единици одговорија со употреба на бибер спреј за да ја растераат толпата.
За да се зачува јавниот ред, дополнителни безбедносни сили беа преместени од неколку делови на Тбилиси во центарот на главниот град, јавија руските медиуми.
Муртаз Зоделава, членка на опозициската партија Обединето национално движење претходно им рече на десетиците илјади собрани на Плоштадот на слободата во Тбилиси дека следниот чекор ќе биде „преземање на претседателската палата“, откако организаторите на протестот објавија дека „власта се вратила кај народот“.
Опозицијата тврди дека станува збор за „мирна револуција“ најавена за денот на локалните избори, додека владејачката партија Грузиски сон наведува дека внатрешни и надворешни актери стојат зад инцидентите.
Локалните избори се одржуваат истовремено во 64 општини и региони низ цела Грузија, а граѓаните избираат градоначалници на 5 самоуправни градови, Тбилиси, Кутаиси, Батуми, Рустави и Поти – како и градоначалници на 59 општини и советници на локалните собранија.
Во изборниот процес учествуваат 12 политички партии, додека дел од опозицијата најави бојкот.
За функцијата градоначалник на Тбилиси се кандидираа 9 лица, меѓу кои и актуелниот градоначалник од редовите на Грузиски сон Каха Каладзе, кој ја извршува оваа функција од 2017 година.
