Повеќе од 80 шпански медиуми ја тужат „Мета“ поради проблематичен систем за рекламирање

Повеќе од 80 шпански медиуми ја тужат Мета, сопственикот на Фејсбук и Инстаграм, за штети предизвикани од нивниот систем за рекламирање, во судскиот процес што започна утрово во Мадрид.

Рошиштето започна околу 10 часот наутро во Трговскиот суд и се очекува да трае до утре.

Главното здружение на печатени медиуми во Шпанија, АМИ, поднесе тужба во декември 2023 година против ирскиот огранок на Мета, каде што се наоѓа европското седиште на американската компанија, барајќи 551 милион евра отштета за нелојална конкуренција во продажбата на дигитално рекламирање.

- Advertisement -

„Станува збор за опстанокот на медиумските куќи загрозени од предаторското однесување на платформа како Мета, која работи без да ја почитува нашата законска рамка“, изјави извршната директорка на АМИ, Ирена Ланзако, пред новинарите пред почетокот на судењето.

Ланзако тврди дека Мета вршела „масовно профилирање на однесувањето на сите интернет корисници и, врз основа на ова, без да ги информира или да добие нивна согласност, продавала сегментирано рекламирање, со што остварила огромен профит од дејство кое било нелегално од регулаторна гледна точка“.

АМИ ја обвини Мета за кршење на европските прописи за заштита на податоци од мај 2018 до јули 2023 година, користејќи ги податоците на корисниците без нивна согласност за креирање индивидуализирани рекламни профили.

Мета рече дека тврдењето е неосновано бидејќи нема докази, како и тврди дека „намерно ја игнорирала еволуцијата на рекламната индустрија“.

„Мета ги почитува сите важечки закони и обезбеди јасни опции, транспарентни информации и широк спектар на алатки за корисниците да го контролираат своето искуство на нашите услуги“, се додава во соопштението.

Сведоците ќе бидат сослушани денес, а извештаите на експертите и поднесоците на страните ќе бидат презентирани утре.

Медиумските групи претставени од АМИ вклучуваат Приса, сопственик на дневниот весник Ел Паис и спортскиот весник АС, како и Годо, Унидад Едиторијал и Воченто, кој го издава конзервативниот дневен весник АБЦ.

Шпанските телевизиски и радио станици, покрај членовите на АМИ, поднесоа и тужба против Мета, барајќи отштета од 160 милиони евра.